Рами Малек ќе глуми негативец во новиот филм за Џејмс Бонд

Оскаровецот Рами Малек ќе биде дел од актерската постава во новиот филм од франшизата за тајниот агент 007, пренесува ВВС.

Станува збор за 25. официјален филм за Џејмс Бонд, а потврда за ангажманот на Малек во ова филмско остварување беше соопштена на настанот посветен на најавениот филмски хит кој се одржа во Јамајка.

Малек освои Оскар за најдобра машка главна улога за толкувањето на ликот на рок легендата Фреди Меркјури во филмот „Bohemian Rhapsody“, а сега ќе имаме можност да го видиме во малку поинакво, „негативно“ издание.

Сценаристката Фиби Валер-Бриџ се придружи на екипата сценаристи кои работат на филмот, а името на новото продолжение со Џејмс Бонд уште не се открива за јавноста. Премиерата е закажана за април, 2020 година.

Ова ќе биде петти и последен пат Даниел Крег да го глуми славниот таен агент.