Кој ќе тепа на Ел Класико!? ↓↓↓
Ситуацијата со коронавирусот во Индија е сè подраматична и покатастрофална. Во последните 24 часа во таа земја починаа 3.293 лица, со што бројот на мртви надмина 200.000.
Индија сега има 201.187 жртви на коронавирусот. Бројките се драматични, како и фотографиите и снимките што доаѓаат од таму, а дополнителен проблем е што најлошото допрва доаѓа.
Експертите веруваат дека во Индија има многу повеќе мртви отколку што се соопштува, а дополнителна причина за загриженост е што инфекцијата се шири во густо населените урбани области исто како и во руралните области. Здравствениот систем се распаѓа, места во болниците има сè помалку, а импровизираните болници немаат доволно кислород и лекови за заразените.
Д-р Ашиш Чаудри, директор на една од болниците во Њу Делхи, пред неколку дена изјави дека секоја вечер се буди неколку пати за да ги провери резервите кислород.
„Во моментов купувам кислород по цена на злато“, рече тој.
Сепак, не порасна само цената на кислородот.
„Потоа, инјекциите ремдесивир, кои обично се околу 4.000 рупии, дури и 2.000 рупии, сега луѓето ги купуваат по цена од 40.000 рупии“, додаде тој.
Индиските медиуми пишуваат дека голем број заразени лица остануваат без болнички кревет, па дури и дека луѓето буквално умираат на прагот на болниците чекајќи да добијат помош.
Во исто време, крематориумите работат 24 часа на ден.
Во Њу Делхи, од семејствата на жртвите беше побарано да чекаат во ред за кремирање на најблиските, бидејќи сите термини беа пополнети.
Дури и Градскиот парк во Њу Делхи е претворен во голем крематориум.
Шокантни фотографии и снимки од клади на отворено пристигнуваат од Индија секој ден.
Некои здравствени експерти сметаат дека зголемувањето на бројот на новозаразени се должи на укинувањето на ограничувањата и дозволувањето големи собири, додека други веруваат дека причина за големиот број новозаразени може да биде индиската варијанта на вирусот, која е изолирана во таа густо населена земја.
Индискиот сој, наречен Б.1.617, се смета за позаразен. Има две мутации во шилестиот протеин, кои овозможуваат вирусот да влезе во организмот и, што е особено проблематично, да ги избегне антителата.
Овој сој на вирусот е пријавен и надвор од Индија. Според СЗО, присуството на оваа варијанта на вирусот е откриено во 17 земји во светот.
На 12 април Индија го престигна Бразил на неславната листа на најголеми жаришта во светот. Единствената земја што има поголем број заразени од Индија се САД.
