Раѓањето на синот ѝ донело многу радост и љубов на Хејли Бибер, но и тешкотии за кои ретко се зборува. Манекенката и сопруга на пејачот Џастин Бибер откри дека неколку месеци по породувањето ѝ бил дијагностициран предменструален дисфоричен синдром (ПМДД).
Во интервју за магазинот Women’s Wear Daily, Хејли раскажа дека бременоста и мајчинството дополнително го разбудиле нејзиниот интерес за женското здравје. Како што објасни, во тој период жените доживуваат многубројни физички и емоционални промени, а многу од нив сè уште не се доволно истражени, ниту се тема на отворен разговор.
„Особено откако добив дете, тоа за мене беше многу интензивно и посебно искуство. Толку многу работи се случуваат во текот на бременоста, породувањето и во периодот пред доаѓањето на бебето“, раскажа манекенката.
Но, промените не завршиле со раѓањето на синот. Приближно шест месеци по породувањето забележала дека предменструалните симптоми значително се разликуваат од оние што ги имала претходно. Емоционалните реакции станале посилни, а деновите пред менструацијата особено тешки.
„Откако го добив синот, се соочив со овие проблеми. За оваа состојба не се зборува доволно и нема многу истражувања“, призна Хејли.
Таа додаде дека разговорите со други жени и споделувањето искуства ѝ помагаат полесно да ги надмине тешките моменти. Сознанието дека не е единствената што се соочува со такви проблеми ѝ дава чувство на разбирање и поддршка.
„Мене лично разговорот ми помага да се чувствувам помалку осамено. Кога се препознаваме во искуствата на други жени и отворено зборуваме за она со што се соочуваме, ми се чини дека целиот тој пат станува помалку осамен“, објасни таа.
ПМДД: Кога предменструалните тегоби стануваат многу посилни
Хејли и претходно зборуваше за дијагнозата, при гостувањето во подкастот SHE MD во март годинава. Тогаш откри дека предменструалниот дисфоричен синдром ѝ бил дијагностициран околу шест месеци по раѓањето на синот.
И пред бременоста имала симптоми на ПМС, но по породувањето емоционалните тегоби значително се влошиле. Најтешки ѝ биле деновите пред менструацијата, кога, како што опиша, чувствувала дека ја губи контролата врз сопствениот живот.
„Си помислив: Ова е многу поинтензивно од порано. Во деновите пред менструацијата имав чувство дека целиот живот ќе ми се распадне. Се прашував зошто се чувствувам така. Мислите и чувствата се менуваа, а секој проблем ми изгледаше како најголемата работа на светот“, раскажа таа.
Според неа, тегобите почнувале да се повлекуваат со почетокот на менструацијата, а со текот на времето забележала и постепено намалување на симптомите.
Предменструалниот дисфоричен синдром, познат како ПМДД, е потежок облик на предменструални тегоби. За разлика од вообичаениот ПМС, може да предизвика изразени промени во расположението, раздразливост, анксиозност и депресивни чувства, кои најчесто се појавуваат во неделите пред менструацијата. Симптомите обично почнуваат да се смируваат неколку дена по нејзиниот почеток.
Хејли Бибер сака уште деца
И покрај здравствените тешкотии низ кои поминала, Хејли отворено зборува за тоа колку мајчинството ѝ го променило животот. Таа и Џастин Бибер станаа родители на 22 август 2024 година, кога се роди нивниот син Џек Блуз.
Манекенката во повеќе наврати раскажуваше колку ужива во новата животна улога, нагласувајќи дека отсекогаш се замислувала како мајка.
„Прекрасно е. Отсекогаш знаев дека сакам деца и дека сакам да бидам мајка“, рече таа во подкастот Therapuss.
Хејли претходно откри и дека би сакала семејството да се прошири, но дека не си поставува рокови и не сака да брза со таквите одлуки.
„Дефинитивно сакам уште едно дете. Не брзам, но би сакала да имаме уште едно. Можеби ќе имаме уште четири, можеби три. Навистина не знам. Се трудам да живеам ден за ден“, заклучи Хејли Бибер.
Извор: Story.rs
Учество во игри на среќа е дозволено за лица со 18+ години. Играј одговорно!