Резултатите од анализите кои ги изврши Агенцијата за храна и ветеринарство покажаа дека велешките марули и спанаќ содржат високо присуство на тешки метали, пренесува СДК.
Во една мостра на марула е констатирано присуство на кадмиум од 0,368 мг/кг, што е далеку повеќе од максимално дозволените 0,050 мг/кг. Во примерок од спанаќ е утврдено присуство на кадмиум од 0,373 мг/кг, а во друг примерок имало и 0,645 мг/кг, како и олово 0,360 мг/кг. Максимално дозволена вредност на оловото во спанаќот и марулата е 0,3 мг/кг.
Овие вредности се пронајдени со испитувањата во 2018 година. Во 2017 во спанаќот било констатирано присуство на кадмиум од 0,574 мк/кг. Мострите се земаат од зелените пазари, па од АХВ не можат да кажат во кои делови од велешко се одгледуваат спанаќ и марула со така високи концентрации на тешки метали, кои се опасни по здравјето на луѓето. Во млад кромид и во грозјето не се пронајдени високи концентрации на тешки метали.
