Замина фудбалската легенда Пеле – Бразил прогласи тридневна жалост


Викенд најава: Интер - Милан, Тотенхем - Ман.Сити и Феенорд - ПСВ ↓↓↓



Бразил прогласи тридневна жалост поради смртта на фудбалската икона Пеле.

Погребната церемонија ќе почне в понеделник, на 2 јануари во 10 часот по локално време на стадионот на Сантос во Сао Паоло, каде почна кариерата на Пеле во 1956 година, јавуваат бразилските медиуми.

Телото на Едсон Арантес до Насименто Пеле ќе биде изложено 36 часа на теренот каде ќе може да му се одаде последна почит на трикратниот светски првак во репрезентацијата на Бразил. Погребот ќе се одржи на 3 јануари, пренесува Опсервер.

Бразилските медиуми јавуваат дека раководството на Сантос и градските власти започнале со подготовки за погребот на Пеле неколку месеци пред неговата смрт, кога лекарите известија дека неговата здравствена состојба, по ланската операција на тумор на дебелото црево, се влошува.

Медиумите наведуваат дека подготвени се протоколи слични на оние кои беа на сила при смртта на британската кралица Елизабета. По последното испраќање на легендарниот Пеле на стадионот на Сантос, поворката со телото во придружба на полицијата ќе мине низ улиците на пристанишниот град Сантос.

Погребната поворка ќе мине и покрај куќата која сè уште живее мајката на Пеле, Селеста Арантес, која неодамна го прослави својот 100. роденден.

Пеле во вторник ќе биде погребан по негова желба на гробиштата Меморијал Некропола Екуменика, каде се погребани и неговите роднини и пријатели. Погребот ќе биде затворен за јавноста и на него присуствуваат само членови на потесното семејство и блиски пријатели.