Кога времето не знае на која страна – меѓу свежото ветре и топлите сончеви зраци – модниот избор станува вистински предизвик.
Токму тогаш на сцена стапува непогрешливиот моден сојузник: кардиганот – нежен, лесен, женствен и бескрајно шик. Оваа сезона, плетивото се враќа во голем стил и зазема централно место во пролетно-летните модни колекции.
Заборавете ги класичните џемпери! Новите кардигани се флуидни, воздушни, често украсени со романтични копчиња, чипкани детали или доаѓаат во суптилни пастелни нијанси, и претставуваат клучен моден елемент кој ќе го носите постојано – од утринските прошетки низ град до вечерните излегувања покрај море.
МЕКОТО ДОПИРУВАЊЕ НА СТИЛОТ
Кардиганот е вистински “хамелеон” на гардероберот – совршено се вклопува во секој стил и во секој дел од денот. Нема да ве изненади ако го носите преку сатенски слип фустан за коктел на тераса навечер, или со високи шорцеви и балетанки за тивко утринско кафе во омиленото кафуле. Без разлика дали сте во град или на плажа, кардиганот носи чувство на удобност, а притоа го крева секој аутфит на порафинирано и софистицирано ниво.
ПАЛЕТА НА БОИ ШТО ОСВЕЖУВА
Оваа пролет и лето, изборот на кардигани е богат како летна цветна градина: од класични нијанси како беж, бела и сива, до нежната пудресто розова, лимон жолта, рајасти дизајни и разиграни цветни мотиви. Секој кардиган носи свој карактер – некои се романтични и ретро, додека други зрачат со минимализам и париска елеганција. А најубавата вест? Секогаш постои еден совршен баш за вас.
ЗОШТО ГО САКАМЕ КАРДИГАНОТ?
Затоа што ни дава најважното: чувство на леснотија, слобода и стил во исто време. Во моден свет каде често сме принудени да бираме меѓу удобност и впечатливост, кардиганот докажува дека може да ги имате и двете. Затоа, оваа сезона, нека вашите модни избори бидат меки како плетиво, а сепак забележителни.
За вас избравме 10 од најубавите модели што ќе ве инспирираат да го освежите вашиот гардероб со овој безвременски класик – затоа што елегантната транзиција од пролет кон лето никогаш не изгледала толку шик.
