Еден од најуспешните италијански тренери, Карло Анчелоти со нетрпение го очекува финалето на Купот на Италија помеѓу Милан и Јувентус.
Анчелоти во минатото ги предводеше и двата тима, но остави огромна трага во историјата на „росонерите“ и не крие дека е голем навивач на Милан.
Искусниот стратег изјави дека мечот кој ќе се игра на „Олимпико“ ќе го гледа со дрес од Милан.
„Ќе го гледам финалето на Купот и ќе навивам за Милан, облечен во дрес на „росонерите“. Гатузо заврши фантастична работа и му даде идентитет на тимот. Милан на најдобар можен начин се подготвува за овој меч и треба да биде внимателен, бидејќи Јувентус е тим кој тешко се победува“, изјави Анчелоти.
„Ги познавам новите директори Фасоне и Мирабели и се надевам што поскоро Милан да го вратат на врвот. Што се однесува до мојата иднина сигурно нема да се вратам во Италија. Сакам да водам некој клуб, но можно е да останам уште една година слободен“, додаде италијанскиот стратег.
