Промена на врвот на „Ди-си студиос“: Џејмс Ган и Питер Сафран заминуваат од раководните функции

Голема промена во раководството на „Ди-си студиос“: Џејмс Ган и Питер Сафран ги напуштаат функциите копретседатели и коизвршни директори, во период кога студиото е под новата сопственост на „Скајденс“.

Двајцата ги презедоа овие позиции пред четири години.

Според „Дедлајн“, тие ќе продолжат да работат на тековните проекти, но отсега целосно ќе ѝ се посветат на креативната работа.

Во моментов интензивно работат на „Man of Tomorrow“, продолжението на „Супермен“ од 2025 година.

Ган и Сафран се огласија за заминувањето

„Пред четири години тргнавме со цел да го обединиме Ди-си под една креативна визија. Во тој период помогнавме Супермен повторно да го заземе централното место во Ди-си, а истовремено отворивме нови можности и раскажавме нови филмски и телевизиски приказни преку Peacemaker, Creature Commandos, Lanterns и Clayface“, наведоа тие. „Неизмерно сме горди на тимот што ја претвори таа амбиција во реалност, вклучувајќи ги актерите, екипите и раководителите со кои имавме можност да соработуваме.“

Џереми Лачам го презема раководењето

Џереми Лачам, поранешен виш потпретседател за продукција и развој во „Марвел“, ќе ја преземе функцијата претседател и главен креативен директор.

„Нашата креативна соработка со Џереми датира уште од времето во Марвел и со нетрпение очекуваме да видиме каква перспектива ќе донесе во следното поглавје на Ди-си. Возбудени сме што се враќаме на она што првично нè привлече кон оваа работа: раскажувањето приказни што ги сакаме, вклучувајќи го и следното поглавје од патувањето на Кларк и Лекс во Man of Tomorrow“, додадоа Сафран и Ган.

„Џејмс и Питер започнаа нова ера за Ди-си студиос и го водеа студиото низ период на суштински промени, поставувајќи нови темели и создавајќи програма на проекти на која сме исклучително горди“, изјавија претседателот и извршен директор на „Скајденс“, Дејвид Елисон, и коизвршниот директор Инон Крајз, пренесува „Холивуд репортер“. „Благодарни сме за нивниот ентузијазам, придонес и посветеност на овој легендарен бренд.“

За новото назначување тие додадоа: „Џереми е долгогодишен креативен соработник на двајцата и имаме целосна доверба дека Џејмс и Питер ќе обезбедат непречено примопредавање во дух на соработка и ќе продолжат внимателно да работат на проектите. Со нетрпение ја очекуваме соработката со Џереми за да ја изградиме следната генерација приказни на Ди-си и дополнително да ја зацврстиме нашата посветеност кон обожавателите.“

Лачам, исто така, се огласи со соопштение: „Ликовите на Ди-си се меѓу најпрепознатливите во американската популарна култура. Ја имав привилегијата да помогнам некои од најславните суперхеројски приказни да оживеат на големото платно, а сега сум возбуден и почестен што добивам можност да го поведам Ди-си студиос во следната ера. Можноста да ги пренесам неверојатните ликови на Ди-си на екранот на начин што ќе ги воодушеви долгогодишните обожаватели, а истовремено ќе ги запознае новите генерации со нивните безвременски приказни, е огромна одговорност што ја сфаќам многу сериозно.“

Извор: Just Jared