Ги правите сите “правилни” работи, но косата сè уште не ви расте? Еве зошто!

Колку пати се случува да се вложува труд во косата – маски, масла, третмани, трпение, а должината и понатаму изгледа како да стои во место? Токму тука произлегува фрустрацијата.

Меѓутоа, вистината е малку поинаква: косата всушност не престанува да расте, туку често се случува истовремено да се крши, па резултатот изгледа како стагнација.

Просечниот раст на косата е околу 1 до 1,5 см месечно, но тоа што се гледа во огледалото зависи од тоа колку од тој нов раст успева да „преживее“ до краевите. И тука почнуваат вистинските проблеми.

1. КОСАТА ПУКА ПОБРЗО ОТКОЛКУ ШТО РАСТЕ

Една од најчестите причини поради кои косата изгледа како да не напредува е кршењето на влакната. Кога краевите се суви, оштетени или постојано изложени на топлина и агресивни третмани, тие се цепат и „исчезнуваат“ исто толку брзо како што новата коса расте од коренот. Резултатот е илузија дека ништо не се менува.

2. НЕДОВОЛНА ХИДРАТАЦИЈА И ИСХРАНА НА КОСАТА

Сувата коса е кршлива коса. Без редовна хидратација преку маски, регенератори и leave-in производи, влакното губи еластичност и станува подложно на кршење. Покрај тоа, и внатрешната исхрана игра голема улога – недостигот на протеини, железо, цинк и витамини од Б комплексот може да го успори квалитетниот раст и да ја ослаби структурата на влакното.

3. ТОПЛИНА И СЕКОЈДНЕВНИ НАВИКИ КОИ ЈА УНИШТУВААТ ДОЛЖИНАТА

Пегли, фигара, фенови на високи температури – сето тоа со време ја суши косата. Но, проблемот не се само уредите. Цврсти фризури како затегнати коњски репови и пунџи можат да предизвикаат механичко кршење, додека агресивното чешлање на влажна коса дополнително го зголемува ризикот од оштетување.

4. ЗАНЕМАРУВАЊЕ НА КОЖАТА НА ГЛАВАТА (СКАЛПОТ)

Кожата на главата е темел на здравата коса – буквално „почвата“ од која таа расте. Доколку е запуштена, мрсна, преоптоварена со производи или без соодветна циркулација, фоликулите не функционираат оптимално. Затоа е важно повремено длабинско чистење, благ пилинг и стимулација на кожата на главата со масажа, бидејќи подобрата циркулација значи и подобар раст.

Косата не „се откажува“ од растот – таа само ја губи битката помеѓу она што расте и она што се крши. Кога ќе се намали оштетувањето, ќе се подобри негата и ќе се обрне внимание на кожата на главата, должината почнува да се гледа многу појасно.

Со други зборови, проблемот најчесто не е во тоа што косата не расте – туку што не успева да остане доволно долго нетакната за да се забележи тој раст.