Обврските постојано ги оставате за подоцна? Одвојте еден час за она што го избегнувате

Имате многу обврски, а не знаете од каде да почнете? Наместо да се фатите за работа, го проверувате телефонот, подготвувате уште едно кафе или се занимавате со ситници што воопшто не се итни? Ако се препознавате во ова, можеби проблемот не е во недостигот од дисциплина, туку ви треба поинаков пристап кон обврските. На таа идеја се темели scary hour, метод за организирање на времето што стана популарен на социјалните мрежи.

Замислата е едноставна: одвојте еден час за задачите што упорно ги одложувате. Не чекајте да добиете мотивација, не составувајте бескрајни списоци и не прескокнувајте постојано од една обврска на друга. Целта не е за 60 минути да завршите сè, туку конечно да почнете со она што со денови ви тежи.

Што подразбира методот „scary hour“?

Називот scary hour буквално би значел „страшен час“. Станува збор за однапред одредено време во кое им се посветуваме на задачите што ги избегнуваме. Тоа може да биде одговарање на електронска пошта, закажување преглед, средување документи, плаќање сметки, планирање на буџетот, расчистување на плакарот или завршување на натрупаните ситни домашни обврски.

Намерата не е да си наметнеме уште една обврска, туку наместо да одложуваме, да преземеме нешто конкретно. Наместо цел ден да мислиме на сè што треба да направиме, издвојуваме точно 60 минути за тие задачи. Кога ќе истече времето, можеме да запреме, дури и ако не сме завршиле сè од списокот.

Ваквиот пристап може особено да помогне кога не ве оптоварува само обемот на работата, туку и тоа што не знаете од каде да почнете. Кога сите обврски ги чуваме во мислите, тие лесно ни изгледаат поголеми и посложени отколку што навистина се.

Зошто ги одложуваме и едноставните задачи?

Одложувањето, познато и како прокрастинација, често се поврзува со мрзеливост или недоволна дисциплина. Сепак, причините можат да бидат многу посложени. Понекогаш нè сопира стравот дека нема доволно добро да ја завршиме задачата, понекогаш ни е непријатно да се соочиме со одредена ситуација, а понекогаш сме едноставно преоптоварени и не знаеме од каде да тргнеме.

Психолошките истражувања покажуваат дека одложувањето често е поврзано со регулирањето на емоциите. Избегнувајќи ја задачата, привремено ја избегнуваме и непријатноста што таа ја предизвикува. Но олеснувањето трае кратко, а незавршената обврска продолжува да нè оптоварува.

Токму тука може да помогне scary hour. Наместо да чекаме да исчезне непријатното чувство или да се појави мотивација, однапред одредуваме кога ќе се зафатиме со тие обврски. Ограничувањето на еден час може да го олесни почетокот: не мора да решиме сè одеднаш, туку само да го искористиме времето што сме го издвоиле.

Како да го примените овој метод?

Запишете ги обврските што ги одложувате. Ставете на хартија сè што ве оптоварува подолго време, па изберете неколку конкретни задачи што реално можете да ги почнете или да ги завршите. Одвојте еден час во денот кога ќе можете да работите без прекини. На некого повеќе ќе му одговара утрото, а на друг периодот по работа.

Наместете тајмер и отстранете го сè она што ви го одвлекува вниманието. Исклучете го звукот на известувањата, тргнете го телефонот и обидете се да не преминувате од една задача на друга без потреба. Важно е навистина да им се посветите на работите што досега сте ги избегнувале. Почнете со задачата што ви изгледа најлесна, наместо веднаш да се соочите со онаа кон која чувствувате најголем отпор. Една завршена обврска може да ви даде поттик да продолжите со следната.

Кога ќе истече времето, запрете. Тоа што не сте завршиле сè од списокот не значи дека сте потфрлиле. Запишете што останало и оставете го за следниот пат. Ако ви одговара овој начин на работа, можете да го практикувате еднаш неделно или секогаш кога ќе ви се натрупаат обврски.

Мора ли сè да биде завршено за еден час?

Најголемата замка би била овој метод да го претвориме во уште еден тест за продуктивност и повод да се прекоруваме ако не ги исполниме сите очекувања. Ова не е трка со часовникот, туку начин да го намалиме отпорот кон задачите што постојано ги одложуваме. Ако еден час ви изгледа премногу, можете да почнете со 15 или 30 минути и постепено да го пронајдете ритамот што ви одговара.

Извор: Lepota i Zdravlje