„Наопака бајка“ – песната од Балашевиќ која неговата ќерка одбегнува да ја слуша

Ќерката на Ѓорѓе Балашевиќ, Јелена Беба Балашевиќ, во емисијата Мои 50 на радио Накси откри зошто не сака да ја слуша песната „Наопака бајка“ која Ѓорѓе ја напишал за тешката сообраќајна несреќа која Јелена ја доживеала во 1999 година.

Таа откри и засега непознати детали за дела кои публиката сè уште не ги слушнала и видела, а кои останале зад познатиот кантавтор.

„Тоа е песната на татко ми што избегнувам да ја слушнам. На некој начин се плашам од неа. Се сеќавам кога излезе од студиото, ми најави дека ќе направи песна поврзана со настан кој ми се случи во 1999 година кога имав сообраќајна несреќа.Тешко бев повредена и тоа, за жал, остави трага на сите нас до крајот на животот“, изјави Јелена.

„Сепак, заедно излеговме како победници. Тоа е единствената песна што ја избегнувам во широк лак. Ме враќа во тој период кој изгледаше како еден тунел, без ни најмал зрак светлина“, додаде таа. Таа откри и дека наскоро излегува комедија напишана од Ѓорѓе.

„Ѓоле напиша комедија, драма, прва и единствена театарска претстава. Секој негов збор заслужува да си го најде своето место пред публиката и на сцената, каде што беше апсолутен крал. Таа претстава ќе биде се` што е – Ѓоле!”

„Со исклучок на „Како ран мраз“, напишан во форма на сценарио, ова е првиот драмски текст напишан од Џоле. Се уште не можеме да го откриеме насловот бидејќи е специфична игра на зборови, но претставата е комедија на ситуација во која се наоѓаат неколку ликови во околности кои беа несреќни за оваа држава и општество“, додаде Јелена.

Таа објасни дека делото е смислено со многу музика и хумор, малку историски податоци, конфликт и заплет, со среќен крај.

Инаку, Јелена неодамна на Фејсбук откри дека нема да се одбележи годишнината од смртта на нејзиниот татко. Таа испрати посебна порака до неговите фанови.