Мотоциклист се загубил по чешките патишта – бизарната причина за тоа ќе ве насмее

Фински мотоциклист се загубил во Чешка, користејќи мапа којашто потекнувала уште од советскиот период, пишуваат локалните медиуми.

Избезумениот 64-годишник за помош ѝ се обратил на полициската патрола крај градот Тахов на западот од Чешка, го пренесува агенцијата DPA пишувањето во четвртокот на дневниот весник Pravo.

Меѓутоа, полицајците се посомневале дека е пијан, па го тестирале и утврдиле дека испил некоја чашка повеќе, додава весникот.

Наредено му е веднаш да ја напушти Чешка, а казнет е и со 749 долари и тригодишна забрана за возење во оваа земја.

Финецот тврдел дека испил малку алкохол за да се смири, наведува весникот.

Поранешната комунистичка Чехословачка мирно се подели во 1993 година на Чешка и Словачка. Многу од патиштата именувани според комунистичките челници и за оваа идеологија важни датуми се преименувани по падот на Советскиот сојуз во 1989 година.