Тренерот на Милан, Винченцо Монтела во опширно интервју кое го даде за „Газета дело Спорт“ ги откри плановите на клубот до крајот на трансфер пазарот.
Милан е еден од најактивните клубови на трансфер пазарот и веќе донесе девет нови засилувања, но не мисли да застене тука, а Монтела откри дека до крајот на преодниот рок ќе пристигнат уште три засилувања.
„Моравме да настапиме агресвно на трансфер пазарот доколку сакаме да ја намалиме разликата со Рома и Наполи. Овој тим кој Милан го гради ова лето ќе трае долго и ќе има голема вредност и после неколку години, без разлика кој ќе биде тренер. Се надевам дека јас ќе бидам тој кој ќе го врати клубот на врвот, но тимот сеуште не е комплетиран“, истакна Монтела и додаде:
„Фокусот сега е на врвен напаѓач, но сакаме да донесеме и уште еден крилен напаѓач и еден играч за врска. Меѓутоа сега тимот има силна основа и не брзаме околу овие трансфери, има време до крајот на преодниот рок“.
Монтела потоа проговори за трансферот на Бонучи и потврди дека тој бил иницијатор директорите да започнат преговори за италијанскиот дефанзивец.
„Јас ова лето сонувам, а за среќа соновите ми се исполнуваат. Веднаш штом дознав дека постои шанса Бонучи да замине од Јувентус инсистирав Мирабели и Фасоне да го донесат во Милан. Тие не веруваа дека е возможно, но јас по десет пати на ден им праќав СМС и им го барав Бонучи. Лео е еден од најдобрите дефанзивци во светот и ќе биде огромно засилување, тој е вистински лидер“, истакна Монтела кој порача дека сеуште е рано да се размислува за Скудето и дека целта е пласман во Лигата на шампиони следната сезона.
