Три пакувања со вкупна тежина од килограм и половина марихуана нашле тетовските полицајци денес во близина на автобуската станица.
Наутро околу 8 часот, полициски службеници на Секторот за внатрешни работи Тетово во непосредна близина на меѓуградската автобуска станица во Тетово пронашле и подигнале две најлонски пакувања со непозната зелена тревлива материја, најверојатно марихуана. Двете пакувања со тежина од по околу 500 грама биле завиткани со кафена селотејп лента и се наоѓале оставени покрај високонапонски трансформатор во близина, а на педесетина метри оддалеченост пронајдено е уште едно вакво пакување со толкава тежина.
Трите пакувања се фотодокументирани и ќе се вештачи нивната содржина, а по извршениот увид се превземаат и мерки и активности за утврдување на тоа-кој и кога ги оставил, односно за кого биле наменети пакувањата, соопштија од СВР Тетово.
Според евиденцијата на СВР Тетово марихуаната и во последно време кокаинот се најбараните наркотични средства на пошироките полошки простори. Во текот на 2016 година во 68-те откриени и пријавени кривични дела на подрачјето на СВР Тетово во кои вкупно биле инволвирани 77 сторители, а за кои била поднесена 61 кривична пријава, пронајдени и одземени се над 192 килограми марихуана, 55 грама хероин и други, помали количини вакви средства.
Во Тетовско, вкупниот број на регистрирани наркозависници, според регистерот на СВР Тетово, изнесува 489, од кои 40-тина лани се новорегистрирани. Во најголем број станува збор за машки лица, на возраст од 15-16 најмладиот до 60 години највозрасниот.
