Фармерките во димносива боја се есенскиот ривал на класичниот син тексас

На сините фармерки секогаш им се навраќаме, но оваа есен една друга боја се наметнува како сериозна конкуренција. Станува збор за таканаречените smoky фармерки — модели во димносиви нијанси што ја задржуваат опуштеноста на класичниот тексас, но изгледаат пософистицирано. Ненаметливи се, лесно се вклопуваат со облеката што веќе ја имаме и внесуваат промислен, урбан печат во секоја комбинација. Нивната актуелност не е случајна: сивиот тексас сè почесто е присутен и во колекциите на големите модни куќи, меѓу кои „Диор“ и „Луј Витон“, што го потврдува неговото забележително враќање оваа сезона.

@remyshn

@remyshn

@remyshn

Што ги издвојува од обичните сиви фармерки?

Овие фармерки доаѓаат во тонови што потсетуваат на чад, пепел и потемнет графит. Распонот се движи од светлосива боја со ладен подтон до длабока антрацитна нијанса, а некои модели имаат благо испран изглед, како да се прекриени со тенок слој прав. Токму таа нерамномерна длабочина на бојата ги прави повпечатливи од вообичаениот сив тексас. Црните фармерки понекогаш оставаат построг впечаток, додека светлосините се изразито лежерни. Димносивите се некаде меѓу нив: доволно впечатливи за да освежат едноставна комбинација, а сепак неутрални како омилениот пар класични фармерки.

Зошто се толку барани оваа есен?

Нивната најголема предност е едноставното комбинирање. Сивата е меѓу најблагодарните неутрални бои, па овие фармерки одлично се согласуваат со црна, бела, темносина и беж. Подеднакво добро изгледаат и со побогатите есенски тонови, како бордо, чоколаднокафеава, маслинестозелена и темновиолетова.

Особено убаво се вклопуваат со облека од волна, кашмир и кожа. Едноставен џемпер, квалитетен ремен и чизми се доволни за дотеран изглед што не делува претерано осмислен. За поелегантна варијанта, комбинирајте ги со бела кошула, сако и чевли со шпицест врв. За опуштен дневен изглед, добар избор се патики, широк џемпер и долг капут. Тие се и интересна замена за белиот тексас: ја задржуваат неговата свежина и можноста да ја осветлат комбинацијата, но се попрактични за секојдневно носење во есенските и зимските месеци.

@whatgigiwears

@whatgigiwears

@whatgigiwears

Каков крој да одберете?

Најлесно ќе ги вклопите во гардеробата ако се држите до кројот што и инаку најмногу го сакате. Моделите со прави ногавици се сигурна опција: визуелно ја издолжуваат силуетата и добро изгледаат и со патики и со поелегантни чевли. Широките фармерки внесуваат поопуштен, современ изглед, особено во спој со потесни горни делови. За поженствена силуета, тука се моделите со благо проширени ногавици. На љубителките на минимализмот, пак, најмногу би им одговарале едноставни темносиви фармерки, без нагласен испран ефект и без многу детали.

При изборот на нијансата, водете се од остатокот од гардеробата. Посветлите модели, во сива боја налик на камче, оставаат понежен и полежерен впечаток, додека графитните и антрацитните се одлична основа за пософистицирани комбинации.

Извор: Lepota i Zdravlje