Џои Кинг со главни улоги во два нови научнофантастични филма

Џои Кинг ќе ги толкува главните улоги во два нови научнофантастични проекта, беше објавено неделава. Актерката, која има 27 години и номинација за наградата „Еми“, ја очекуваат две сосема различни приказни за љубовта и човечките врски.

„Safe Space“

Во провокативната романтична комедија со вонземјани „Safe Space“, Кинг ќе глуми заедно со Лакит Стенфилд.

Според синопсисот што го пренесува „Вараети“, филмот е сатирично преиспитување на значењето на сексот и љубовта. Кинг ја игра Шери, интелигентна, но несигурна научничка која излегува од токсична врска со колега, само за веднаш потоа да влезе во најтоксичната врска во галаксијата — со прекрасен вонземјанин, кого го игра Стенфилд.

„Работата со Џои и Лакит на неверојатен креативен начин го оживеа сценариото. Нивната хемија е заслепувачка. Заедно ќе бидат вистинско откритие за публиката“, изјави режисерката Џилијан Волас Хорват.

За „Safe Space“ во моментов се обезбедуваат финансиски средства, а снимањето се очекува да почне во вториот квартал од 2027 година во САД. Во тек е и изборот на останатите актери.

„Almost You“

Кинг ќе се појави и покрај Џејмс Мекавој и Џуно Темпл во научнофантастичната комедија „Almost You“, која се занимава со вештачката интелигенција.

Како што пренесува „Вараети“, приказната ја следи Фиби, брилијантна инженерка по роботика која тешко се помирува со смртта на својата помлада сестра Иди. Прекршувајќи ги сите протоколи на технолошката компанија во која работи, таа користи пораки, видеа и објави на социјалните мрежи собирани со години за да создаде верна реплика на сестра си со помош на вештачка интелигенција.

На почетокот, репликата ѝ носи голема радост и утеха. Но нејзиниот извонреден изум набргу ја соочува со едно речиси невозможно прашање: ако можете да вратите некого, дали треба да го направите тоа?

„Никогаш немало филм што било толку неопходно да се сними како овој. Мислевме дека правиме филм за иднината, а се покажа дека тој зборува за сегашноста. Џуно, Џои и Џејмс ќе ве насмеат, потоа ќе ви го скршат срцето, па повторно ќе ве натераат да се смеете на сето тоа“, изјави режисерот Мет Липси.

Снимањето на „Almost You“ веќе е во тек во Глазгов.

Извор: Just Jared