Бјути ДИЈ: пет природни маски за лице со цимет

Пет различни маски за различни проблеми со кожата!

Стигна тоа време од годината кога сè мириса на цимет. И не само што овој ароматичен зачин е вкусен во десерти, туку е и одличен за нега на кожата. Во продолжение ви откриваме 5 рецепти за маски со цимет во главна улога.

Предупредување: Доколку сте алергични на цимет, не нанесувајте ги овие маски на лицето!

Маска со цимет и мед за кожа склона кон акни

Ако имате проблеми со акни, пробајте ја оваа маска со цимет и мед што ќе го освежи вашето лице и ќе ги третира акните благодарение на своите антисептички својства.

Подготовка: Измешајте 1/2 лажичка цимет во прав и 2 лажички мед. Нанесете ја на претходно исчистено лице и оставете да делува 15-20 минути. Измијте со млака вода.

Маска со цимет и папаја за сјајна кожа

Ако вашата кожа изгледа заморно и безживотно, оваа маска е идеална за вас.

Подготовка: Измешајте 1/2 лажичка цимет во прав со сок или месо од папаја (ако користите месо, смесата изматете ја со блендер). Нанесете ја на лицето и оставете да стои 20 минути.

Маска со цимет и белка против стареење

Белката ја затега кожата, а циметот го поттикнува природното создавање на колаген.

Подготовка: Добро измешајте 1/2 лажичка цимет во прав и додадете изматена белка. Направете паста и нанесете ја на исчистено лице, оставете ја да стои додека целосно не се исуши. Измијте со млака вода. Користете ја маската двапати неделно за видливи резултати.

2-во-1 маска и пилинг со цимет и овесни снегулки

Подготовка: Прелијте овесни снегулки со млеко. Кога ќе омекнат, измешајте ги со малку цимет. Нанесете ја смесата на чисто лице и оставете да се исуши. Потоа, направете нежна масажа со кружни движења за ефект на пилинг.

Маска со цимет и оризово брашно

Дали сакате природно да ја осветлите кожата? Можете да го постигнете тоа со комбинација од цимет и оризово брашно.

Подготовка: Измешајте еднаква количина цимет во прав, оризово брашно и малку вода. Нанесете на исчистено лице и оставете да делува 5 минути. Потоа масирајте го лицето и измијте со млака вода.