Уствари викендов е затишје пред бура! ↓↓↓
Статусот кој вчера беше објавен на официјалната Фејсбук страница од Никола Груевски дека тој се наоѓа во Будимпешта, каде бара политички азил, не ги запали само македонските медиуми, туку ги полни и соседните, грчки медиуми, пренесува дописничката на МИА од Атина.
Веста беше дел и од синоќешните централни изданија на вестите на грчките телевизии, а новинарите акцентот го ставија на информацијата дека Груевски побегна кај Орбан.
„Од премиер, бегалец” , беше насловот што го одбра грчката телевизија „Антена“ за да го најави прилогот посветен на поранешниот македонски премиер.
„Во Скопје го бараа, во Будимпешта е поранешниот премиер Никола Груевски кај Виктор Орбан, кој никогаш не го поздрави Договорот од Преспа и отсекогаш беше пријател на Груевски“, објави грчката телевизија „Антена” во прилогот во кој споменува дека Груевски беше 10 години премиер, а е осуден на 2 годишна затворска казна.
Новинарот од грчката телевизија „Скај”, ги потсети гледачите дека „Греувски, во периодот додека беше премиер имаше многу добри односи со владата на Орбан”.
„Како голем националист отиде кај неговиот добар пријател Орбан, другиот голем националист и ултра десничар“, коментираше новинарот од „Алфа”, додека пак веста беше најавена под насловот „Избега за да не оди во затвор”.
Весникот „Катимерини”, веста за Никола Груевски ја објави на насловната страница, во текст под наслов „Груевски бара азил кај Орбан“.
„Партијата на Груевски, ВМРО-ДПМНЕ одржува тесни врски со унгарскиот премиер Виктор Орбан, кој минатиот јуни се постави против Договорот од Преспа“, пишува „Катимерини“.
Електронските изданија на грчките медиуми во поголемиот број го презедоа текстот под наслов „ПЈРМ: Груевски се наоѓа во Унгарија, каде што бара политички азил“, објавен од грчката новинска агенција АНА-МПА.
