Панталоните од еко-кожа со висок струк лесно се вклопуваат во секоја есенска и зимска комбинација

Кожените панталони секоја сезона се враќаат во поинакво издание, а оваа есен и зима вниманието го привлекуваат моделите од еко-кожа со висок струк. Нивната привлечност е во впечатливата текстура, кројот што им прилега на различни градби и способноста секоја комбинација да ја направат поосмислена. Без разлика дали ги носите со џемпер, класична бела кошула или елегантно сако, лесно се приспособуваат и на дневниот и на вечерниот стил. Најголемата предност им е што не бараат многу комбинирање за да изгледаат одлично.

Зошто моделите со висок струк повторно се во центарот на вниманието?

Еко-кожата веќе неколку сезони има значајно место во есенските и зимските колекции. Годинава предност имаат практичните парчиња што не изгледаат ниту премногу наметливо ниту како минлив тренд, а панталоните со висок струк се токму таков пример. Визуелно ги издолжуваат нозете, го нагласуваат струкот и создаваат складни пропорции, додека текстурата на кожата им дава структура и карактер. Особено се издвојуваат моделите со прави или благо проширени ногавици, како и покомотните кроеви со дискретни набори кај струкот. За разлика од многу тесните панталони, кои често се потешки за комбинирање, овие модели изгледаат современо, удобни се и се доволно елегантни за различни пригоди.

@natmosca

@natmosca

@natmosca

Како да ги комбинирате оваа сезона?

Една од главните предности на панталоните од еко-кожа е што лесно се вклопуваат во различни стилови. За дневни изданија одлично одат со широки џемпери од волна или кашмир. Контрастот меѓу мекото плетиво и суптилниот сјај на еко-кожата ја прави комбинацијата поинтересна, без многу труд. За поелегантен изглед, спојте ги со бела кошула, тенок ремен и чизми со шпицест врв. Таквата комбинација е доволно префинета за во канцеларија или за деловен ручек, особено ако панталоните се со прав крој и мат површина.

За вечерните излегувања, еко-кожата добива поинаков израз. Во комбинација со топ со интересен изрез, сатенска блуза или припиено боди, панталоните со висок струк стануваат основа на впечатлив изглед. Доволни се уште забележливи обетки, мала чанта и чевли со потпетици, без потреба од многу дополнителни детали.

Кои бои и кроеви да ги изберете?

Црните панталони од еко-кожа и натаму се најсигурниот избор бидејќи лесно се вклопуваат со речиси сите бои и стилови. Сепак, сезонава вреди да се обрне внимание и на чоколаднокафената, темнобордо и нијансата на коњак, кои особено убаво се согласуваат со есенската палета. Моделите со прави ногавици се најразновидни за комбинирање, додека широките ногавици внесуваат поопуштен изглед со мала доза ретро шарм. За љубителките на минимализмот, добар избор се панталоните со ненаметливи шевови, скриено закопчување и мат површина, кои изгледаат речиси како класични панталони со елегантен крој.

@coosh.wear

@coosh.wear

@coosh.wear

Извор: Lepota i Zdravlje