Френки Муниз пуштен од болница по несреќата во Дејтона: „Имам болки, но автомобилот ме заштити“

Френки Муниз се огласи откако беше пуштен од болница по несреќата што ја доживеа на тркачката патека во Дејтона.

Четириесетгодишниот актер од серијата „Малколм во средина“, кој професионално се занимава со автомобилизам од 2006 година, доживеал несреќа за време на тренинг во средата, на 11 ноември, по што итно бил пренесен во болница. Според информациите, се подготвувал за трката „Прауд ту хонор“, во рамките на настанот „Ветеранс деј класик“, на меѓународната патека во Дејтона Бич, Флорида.

Подоцна истиот ден, по излегувањето од болница, Муниз објави изјава.

„Разочаран сум што вечерва нема да можам да учествувам на настанот ‘Прауд ту хонор’ на Форд. Со нетрпение очекував да им оддадам признание на нашите ветерани за нивната служба и да се натпреварувам со овие извонредни возачи“, изјави Муниз за НАСКАР.

„Имам малку болки, но мојот мустанг ја заврши својата работа и ме заштити. Сакам да им се заблагодарам на сите во Форд рејсинг, на меѓународната патека во Дејтона и на персоналот тука во болницата. Особено им благодарам на сите што ми се јавија и што се молеа за мене“, додаде тој.

Муниз требаше да настапи во ревијалната трка заедно со Остин Синдрик, возач на тимот Пенске, како претставници на Военото воздухопловство на САД. Поради несреќата, на негово место се натпреваруваше Џенсон Алцман, возач од развојната програма на фабричкиот тим на Форд.

Извор: Just Jared