Жени наспроти мажи: кој навистина чувствува поголема болка?

БИОЛОГИЈА НА БОЛКАТА СПОРЕД ПОЛОТ

Професорот Џефри Могил од универзитетот МекГил објаснува дека прашањето „кој почувствува повеќе болка“ има јасен одговор – жените. Нивната поголема осетливост се поврзува со хормонални, мозочни и имунолошки процеси. За време на пубертетот, кога хормоните драматично се менуваат, зачестеноста на мигрените кај жените се удвојува во споредба со мажите. Исто така, интензитетот на хроничната болка се менува за време на менструалниот циклус.

Но, не се работи само за хормони. Регијата sgACC (subgenual anterior cingulate cortex), која има важна улога во природниот систем за ублажување болка, функционира различно кај жени и мажи со иста дијагноза. Истражувањата покажуваат дека жените со анклотизирачки спондилитис имаат посилни врски меѓу sgACC и мозочните зони што ги обработуваат сензорните информации, што објаснува зошто ја чувствуваат болката поинтензивно и реагираат послабо на терапија.

БОЛКА НА ЌЕЛИСКО НИВО

Разликите не се ограничуваат само на мозокот. Истражувањата покажуваат дека постојат специфични гени според полот кои влијаат на перцепцијата на болката. Дури и невроните што ја пренесуваат болката функционираат различно меѓу жените и мажите, што значи дека искуството со болката биолошки е различно уште од самиот почеток.

ХРОНИЧНА БОЛКА: ЖЕНСКА ТЕМА?

Околу 25% од возрасните лица страдаат од хронична болка, но жените значително почесто имаат проблеми со мигрени, фибромијалгија, ревматоиден артритис и синдром на иритабилни црева. Студија во која учествувале повеќе од 42.000 лица открила дека хроничната болка е позастапена кај жените, без разлика на земјата или економскиот статус.

НЕДОСТИГ НА ПЕРСОНАЛИЗИРАНИ ТЕРАПИИ

Иако постојат јасни разлики според полот, многу клинички испитувања сѐ уште не ги земаат предвид овие фактори. На пример, протеинот CGRP предизвикува интензивна болка кај жените, но не и кај мажите. Денеска постојат лекови што го блокираат CGRP и значително го подобруваат третманот на мигрените кај жените, кои се погодени дури три пати почесто од мажите.

КАКО ЖЕНИТЕ МОЖАТ ДА СЕ ГРИЖАТ ПОДОБРО ЗА СВОЕТО ЗДРАВЈЕ

– Запишувајте ги симптомите: водењето дневник на болка може да му помогне на лекарот да разбере што се случува.

– Бидете отворени: не го минимизирајте вашиот бол – објаснете точно како ви го нарушува секојдневието.

– Побарајте поддршка: пријател или член од семејството што е со вас при прегледот може да направи разлика.

– Сменете го лекарот ако е потребно: доколку чувствувате дека не ве слушаат, побарајте второ мислење.

Болката не е иста за секого, и токму затоа ни третманите не треба да бидат исти. Разбирањето на биолошките разлики меѓу жените и мажите носи поефикасни и персонализирани решенија. Информираноста и активно барање соодветна нега остануваат најсилното оружје.