Крај на една модна ера – светот се проѕбогува со Ѓорџо Армани

Крај на една модна ера – светот се збогува со Џорџо Армани

Во 91-та година од животот, нè напушти Џорџо Армани, човекот кој засекогаш го смени концептот на глобалната елеганција.

Визионерот од Пјаченца, Италија – креатор кој од ништо создаде едно од најмоќните модни царства во светот – зад себе остава непроценливо наследство и празнина што модниот свет тешко ќе ја надомести.

Роден во 1934 година, во време на војна и сиромаштија, Армани уште од најрана возраст покажувал префинето око за убавина и хармонија. Иако прво студирал медицина, неговото срце го водело кон уметноста и модата. Својата кариера ја започна во шеесеттите години, работејќи со Нино Черути, а во 1975 година го основа својот легендарен бренд – Армани – кој набргу стана синоним за суптилна моќ и беспрекорна едноставност.

Токму тој му го подари на светот “power suit” – костум со меки, опуштени линии, кој стана обележје на силни жени и мажи во седумдесеттите и осумдесеттите години. Неговиот минималистички пристап, чистите линии и ненаметливата софистицираност го обликуваа модниот свет со децении, а холивудските филмови како “Американски жиголо” со Ричард Гир го зацврстија неговиот статус на икона.

Армани беше повеќе од дизајнер – тој беше вистински архитект на стилот. Изгради глобална империја преку брендовите Емпорио Армани, Армани Ексчејнџ, Џорџо Армани Приве, а подоцна влезе и во светот на луксузни хотели, ресторани и lifestyle проекти, секогаш останувајќи верен на својата визија и со упорно одбивање на големите корпоративни преземања.

Познат по својата скромност и перфекционизам, Армани до последните години лично ги надгледуваше сите колекции. Неговата “тиха револуција” во модата направи елеганцијата да стане безвременска, а едноставноста – врвен луксуз.

Со заминувањето на Џорџо Армани завршува едно од најзначајните поглавја во модната историја. Неговото име засекогаш ќе биде синоним за вечен и софистициран стил, а неговата филозофија за стил и убавина ќе продолжи да инспирира генерации креатори и љубители на модата.