Домаќинки, запишувајте рецепт: Само три состојки за колач што се топи во уста и не се пече

Ако сте љубител на брзи и освежителни десерти, тогаш овој едноставен рецепт со само три состојки ќе ве воодушеви. Колачот е подготвен за миг, а е толку лесен и вкусен што буквално се топи во уста.

Овој рецепт е совршено решение за топли денови, но и за моменти кога ненадејно ве изненадуваат гости, а немате многу време за готвење.

Најубавото е што сами го бирате вкусот – доволно е да изберете сок што ви се допаѓа и вие сте веќе на половина пат до совршен десерт.

Состојки:

100 грама шеќер

1 литар сок (околу 5 чаши – од портокал, вишна или по желба)

120 грама пченкарен скроб (1 шолја)

кокос за украсување (по желба)

Подготовка:

1. Во тенџере ставете пет чаши сок и ставете го на рингла да се загрева полека.

2. Кога ќе се загрее сокот, постепено додавајте го пченкарниот скроб и постојано мешајте за да се соединат состојките и да нема грутки.

3. Потоа додајте и шеќерот, па продолжете со мешање додека смесата не почне да се згуснува и да добива конзистенција слична на пудинг.

4. Штом добие соодветна густина, тргнете го тенџерето од рингла и истурете ја смесата во калапи по желба, кои претходно сте ги навлажниле со вода за колачот да не се лепи.

5. Оставете да се излади и стегне, потоа внимателно извадете ги колачињата од калапите.

6. За финален детал, можете да ги поминете низ кокос за дополнителна свежина и привлечен изглед.

Послужете ги оладени. Најдобро е да стојат некое време во фрижидер пред да се сервираат.

Овој едноставен рецепт е вистински доказ дека најубавите работи во кујната понекогаш се прават од само неколку состојки – брзо, лесно и неодоливо вкусно.