Под креативното водство на Шемен Камали, луксузната француска модна куќа Chloé повторно нè враќа во срцевината на најубавите летни моменти.
Новата капсул колекција „Chloé à la Plage“ е вистинска ода на слободата, едноставноста и природната убавина – токму таа безгрижна атмосфера што летото ја носи со себе. Ова е првата вистинска „high summer“ колекција под водство на Камали, инспирирана од филмската уметност на еден од најистакнатите француски режисери, Ерик Ромер, чии летни комедии како „Полин на плажа“ и „Летна приказна“ ги поставија темелите на естетиката што Колекцијата ја слави.
Во фокусот на кампањата, фотографирана од познатиот фотограф Дејвид Симс, е една од највлијателните жени во модната историја – Клаудија Шифер. Таа е совршена фигура за да ја отелотвори визијата на Камали за модерната, ведра и слободна жена – автентична, самосвестна и со внатрешна слобода која се чувствува во секој нејзин гест. Клаудија лежи на ретро кревет, со овошје во рака, облечена во маичка со карнери и шарено костимче за капење – сценографија и стил што ја истакнуваат нејзината природна елеганција и совршено се совпаѓаат со филозофијата на Chloé.
Колекцијата доминира со женствени, но прости парчиња изработени од природни материјали – лесни памучни фустани, блузи од проѕирни ткаенини со нежни тантелни детали. Комбинацијата на бохо шик естетика со современи resortwear трендови создава совршен летен изглед. Колекцијата е креирана така да ја нагласи сончевата светлина, свежината и чистата, ненаметлива сензуалност на летото. Од меките текстури до воздушните ткаенини што и дозволуваат на кожата да „дише“ – секое парче ја носи суштината на летната слобода и луксуз.
За Камали, летото не е само годишно време, туку и емоционална состојба – топлина, радост и спонтани мисли, споени со префинета, суптилно сензуална елеганција. Таа филозофија е совршено преточена во облеката што не е само моден израз, туку и животен стил – баланс на луксуз, удобност и леснотија.
