Вредноста на рубљата расте, наспроти падот на цената на нафтата

Со падот на цената на нафтата ослабнаа валутите на многу земји извозници на црното злато, но за разлика од нив руската рубља расте веќе четврти месец по ред.

Руската рубља е магнет за кери трговци (carry trade), изјавија експертите за Блумберг.

Кери тргувањето е традиционален метод кој го користат инвеститорите за да заработат пари на пазарот на валути. Основна идеја на овој начин на тргување е едноставна: кери трговците позајмуваат финансиски средства во валути со мал приход и потоа инвестираат во валути со поголем принос.

Додека во минатото рубљата слабееше кога паѓаа и цените на нафтата, сега таа расте и покрај тоа што нафтата во март поефтине за 5 долари.

Руската валута остана стабилна и по изненадното намалување на референтната каматна стапка на Централната банка на Русија од 10,0 на 9,75 насто.

Од почетокот на годината рубљата зајакна околу 7 насто во однос на доларот на 57,14 рубљи и околу 3,5 насто во однос на еврото, на 61,74 рубљи.