Најмалку девет лица го загубија животот во огнената катастрофа која ја предизвикаа пожарите кои пустошат низ Калифорнија. Дополнително, десетици се водат за исчезнати.
Брин Перот Чатфилд на Фејсбук објави снимка како од двете страни на патот се издигаат огнени столбови , низ кои вози за да си го спаси животот.
„Се чувствувам многу ранливо поради објавата на овие снимки, но морав тоа да го направам. Мојот роден град Парадајз гори. Моето семејство е евакуирано и е на безбедно. Но, сите пријатели не се безбедни. Ова е надреално“ , напиша жената, жителка на градот на северот на Калифорнија.
На 600 километри на југот на државата се евакуираат и жителите од елитните населби во близина на Лос Анџелес. Малибу го напуштија бројни холивудски ѕвезди, кои таму имаат луксузни куќи. Меѓу евакуираните се семејството на Ким Кардашијан, актерката Алисиа Милано и режисерот Гиљермо дел Торо.
