Газда на „ганц“ нов BMW M5 целосно го искршил новиот автомобил после само 5 минути од напуштањето на продажниот салон на застапникот за BMW, а овој случај стана вирален хит на социјалните мрежи.
Нема многу детали за незгодата, но судирот веднаш стана вирална сензација откако на Фејсбук беа постирани фотографии и видео од резултатот.
Судирот наводно се случил во Балтимор, Мериленд, САД, откако друг автомобил странично го поткачил новиот BMW. По ова наводно возачот на М5-ката изгубил контрола и удрил во бандера.
Што и да се случило, М5-ката претрпела значителна штета и целиот преден дел бил уништен во судирот. Иако на предниот дел е главниот дел од штетата, може да се забележат и свиткани задна врата и крило. Тука бил најверојатно првичниот контакт со другото возило кога сѐ тргнало во лоша насока.
Во инцидентот нема повредени, но дефинитивно бил лош ден за сопственикот на BMW кое има само 11 километри на мерачот.
М5-ката најверојатно била осигурена, а во САД таа чини 102.700 долари. Има твинтурбо 4,4-литарски V8 кој дава 592 коњски сили, благодарение на кои спортскиот седан до 100 км/ч стигнува за 3,4 секунди и продолжува до максималната брзина од 305 км/ч.
