Претседателот на Република Македонија Ѓорге Иванов денеска во Аман оствари средба со генералната директорка на УНЕСКО Ирина Бокова, на која е разговарано за тековните и идните активности и проекти на Република Македонија во соработка со светската организација за образование, наука и култура.
Како што соопштија од Кабинетот на претседателот, двајцата соговорници ја потврдија одличната соработка меѓу Република Македонија и УНЕСКО и изразија подготвеност за нејзино проширување во насока на натамошна реализација на проекти од областите на културата, образованието, науката, комуникациите, информациите, и во однос на програмите за млади и граѓанското општество.
Иванов истакнал дека Република Македонија ѝ дава големо значење на соработката со УНЕСКО и активно ги промовира и учествува во нејзините активности и иницијативи.
– Република Македонија ги поддржува програмите на УНЕСКО и ние сме исклучително посветени во напорите за заштита на изобилното природно и културно-историско наследство кое го имаме – посочи Иванов и изрази благодарност за поддршката која УНЕСКО континуирано и ја дава на Република Македонија преку проекти реализирани во рамките на мултилатералната и директната соработка.
На средбата се разменети мислења околу актуелните случувања во Република Македонија на политички план, информации за улогата на УНЕСКО во однос на бегалската криза, како и за актуелностите и реформските процеси во светската организација. Во таа насока, Бокова го информирала претседателот Иванов за предизвиците со кои се соочува УНЕСКО.
