Полициска акција во Битола: Затворени четири локали – пронајдена дрога, лица со лажни ковид-сертификати и лица без сертификати

Во акција на полициските служби кородинирано со пвоеќе други институции, синоќа извршена била контрола во четири ноќни клубови и кабареа во Битола. Пронајдена била дрога, лица кои имале лажни ковид – сертификати, лица кои не поседувале такви сертификати, малолетници, а имало и закани кон полицајците. Запечатени се четири локали.

Во периодот од 1.30 до 4.30 часот полициски службеници од Бирото за јавна безбедност при МВР во координација со Државниот пазарен инспекторат, Управата за јавни приходи и Државниот инспекторат за труд спроведоа акциска контрола во четири ноќни клубови и кабареа во Битола, информира МВР.

„При тоа, во два ноќни клуба е пронајдена дрога (прашкаста материја и марихуана) и ќе бидат поднесени кривични пријави по член 215 од Кривичниот законик, едно лице употребило лажен ковид сертификат и за тоа ќе следува соодветна кривична пријава, а до надлежното обвинителство ќе биде поднесен поднесок и против сопственик на објект кој упатувал закани кон полициските службеници и инспекциските служби. Исто така ќе следат соодветни поднесоци и затоа што во ноќен клуб е затекнат малолетник по 24 часот, а биле констатирани прекршоци и по законот за пушење. 42 лица биле пуштени во четирите угостителски објекти без да поседуваат ковид сертификат и тие се запечатени од страна на Државниот пазарен инспекторат и ќе следат соодветни поднесоци. Исто така, констатирани се и случаи на неиздавање на фискална сметка, а од страна на Државниот инспекторат за труд се констатирани 27 прекршоци за работење без договор за вработување. Акциските контроли продолжуваат и во наредниот период“, се вели во информацијата на МВР.