Македонскиот и европски шампион Вардар денес потврди дека Борко Ристовски и Марко Мишевски ставија потписи на договори до крајот на сезоната.
Двајца нови играчи од денеска ќе бидат на располагање на тренерот Стевче Алушовски и до крајот на сезоната ќе го носат дресот на Вардар. На голманската позиција доаѓа репрезентативецот на Македонија, Борко Ристовски, а на бековската позиција „старо-нов” играч е Марко Мишевски.
Ова за Борко ќе биде трет престој во Вардар, претходно беше дел од црвено-црниот табор во периодот од 2001 до 2003 и од 2010 до 2012 година.
Мишевски пак е продукт на младинската школа на Вардар и до лани го носеше дресот на најтрофејниот македонски тим, но замина во Франција, поточно во тимот на Гренобл.
Фото: РК Вардар
