Крцкав тост со свежо сирење и овошје: брз појадок од фритеза на топол воздух

Ако сакате појадок што изгледа како да е послужен во модерен ресторан за бранч, а е готов за само неколку минути, пробајте го овој рецепт. Тостот со свежо зрнесто сирење, подготвен во фритеза на топол воздух, обединува неколку едноставни состојки во кремаст, крцкав, сладок и заситувачки оброк. Врз парче леб се нанесува сирење, се додава банана или бобичесто овошје, а по печењето сè се дополнува со путер од кикиритки.

Рецепт за тост со зрнесто сирење во фритеза на топол воздух

Начинот на печење е клучен: во фритезата лебот станува крцкав, додека сирењето и овошјето благо се запекуваат. Темното чоколадо или лиофилизираните малини му даваат дополнителна нота на вкусот, па овој тост може да биде и здрава алтернатива на класичните слатки тостови.

За една до две порции потребни се:

• 2 кришки интегрален леб или леб со кисело тесто
• 100 г свежо зрнесто сирење (cottage cheese)
• 1 помала банана или една рака боровинки и малини, а може и комбинација од двете
• 1–2 лажички путер од кикиритки
• малку мед, по желба
• неколку парченца темно чоколадо

Како се подготвува?

Најпрво премачкајте ги кришките леб со зрнестото сирење. Нанесете дарежлив слој, но внимавајте да не излегува преку рабовите. Одозгора наредете ја бананата исечена на кругови или бобичестото овошје. Боровинките и малините се особено добар избор, бидејќи нивната лесна киселост убаво се надополнува со кремастото сирење.

Наредете ги подготвените кришки во корпата на фритезата и печете на 195 степени околу 8–10 минути, додека лебот не стане крцкав, а сирењето и овошјето благо не се запечат. Времето на печење може малку да се разликува во зависност од апаратот и дебелината на кришките.

Готовиот тост прелијте го со путер од кикиритки. Ако сакате послатка варијанта, додајте малку мед, а потоа наросете издробени лиофилизирани малини и парченца темно чоколадо. Послужете го топол, како брз утрински оброк или како слатка ужина во текот на денот.

Како да го приспособите рецептот на својот вкус?

Овој тост лесно се приспособува на различни вкусови. Наместо банана, ставете јагоди, капини или боровинки, а путерот од кикиритки заменете го со путер од бадеми или лешници. За поизразен сладок вкус, додајте малку цимет или неколку парченца темно чоколадо со поголем процент какао. Ако сакате похранлива верзија, изберете интегрален леб и дополнете го со малку чиа-семе или мелени ореви. Обичното младо зрнесто сирење дава благ и кремаст вкус, додека козјото има нешто поизразена арома.

Извор: Lepota i Zdravlje