Глеб Савченко за односот со Алан Берстен по критиките: „Немам ништо лично против него“

Глеб Савченко се огласи за односот со колегата од „Танц со ѕвездите“, Алан Берстен, откако јавно го критикуваше неговото танцување.

„Го сакам Алан. Мислам дека е одличен човек и нема ништо лично во ова“, изјави 43-годишниот Савченко во ексклузивен разговор за Us Weekly.

Савченко предизвика реакции минатиот месец кога го доведе во прашање изборот на Берстен за замена на Вал Чмерковски во вечерта посветена на значајни личности во 35. сезона. Четириесетгодишниот Чмерковски беше суспендиран на една недела по спорен коментар упатен кон судијката Кери Ен Инаба. Таа претходно укажа на недозволено подигнување во кореографијата што неговата сопруга Џена Џонсон ја изведе со Хари Шам Џуниор во вечерта посветена на Супербоулот. Додека Чмерковски паузираше, Берстен настапи со Џена Дуан, со која изведе виенски валцер.

„Алан е Алан. Едноставно, не е на тоа танцувачко ниво, точка“, рече Савченко, кој не учествуваше во 35. сезона, за време на пренос во живо на Тикток во октомври. „Зборувам за квалитетот, за техниката. Претпоставувам дека е добар танчар за телевизија, но ако зборуваме за уметност? За создавање уметност? … Кој друг е таму?“

Во следно вклучување во живо, Савченко појасни дека не го „нападнал“ својот колега.

„Алан е добар танчар во својата област. Одличен е во она што го прави. Но, не може да се споредува со Вал. … Не го оцрнувам, само кажувам како стојат работите“, изјави тој.

Во разговорот за Us Weekly во вторникот, Савченко повторно нагласи дека меѓу нив нема лоши чувства, но и дека не се повлекува од кажаното.

„Останувам на своето мислење и навистина не ми е важно што велат другите. А го сакам човекот“, продолжи тој. „Немам ништо против него. Во еден момент ми беше криво за Вал, бидејќи ми е пријател. Беше ставен во ситуација во која, според мене, не требаше да се најде, а продуцентите можеби на некој начин сакаа преку него да им дадат пример на другите.“

Извор: US Weekly