Белата сенка се враќа во мода: како да ја носите и да го продолжите нејзиното траење

Белата сенка за очи повторно е во фокусот, а оваа есен има место и во нежната дневна шминка и во повпечатливите вечерни изгледи. Може да остави само дискретен сјај на капаците или да даде интензивна бела боја. Од мат изглед инспириран од деведесеттите до студени, светкави нијанси, овој класик се враќа во повеќе изданија.

Иако долго време ја поврзувавме со сценската шминка и со нагласените изгледи, белата сенка може да делува и многу ненаметливо. Нанесена на целиот капак, покрај прецизна линија со туш или во спој со неутрални тонови, таа им дава поинаква димензија на очите. Светкавите формули ја рефлектираат светлината, додека мат верзиите полесно се вклопуваат во дневната шминка.

@rikkifeerrar

Како да ја вклучите белата сенка во есенската шминка

Во зависност од нанесувањето, белата сенка може да биде главниот акцент или само мал детал. За дневен изглед, доволна е мала количина во внатрешниот агол на окото или на средината на капакот, за погледот да изгледа посвежо и посветло. За понагласен ефект, нанесете ја на целиот капак и комбинирајте ја со црн туш и маскара. Контрастот меѓу светлиот капак и нагласените трепки ги истакнува очите без многу дополнителни производи.

Белата сенка добро се комбинира и со сиви, сребрени или нежни кафеави тонови. Студените нијанси создаваат современ, речиси леден изглед, а кафеавата го омекнува контрастот и ја прави шминката посоодветна за секојдневни прилики. За посмел изглед, со бела сенка може да се исцртаат графички линии или да се направи подлога за светкави пигменти.

@emilietommerberg

Мат или светкава текстура?

Завршниот ефект на сенката во голема мера го одредува изгледот на шминката. Мат белата сенка дава поинтензивна боја и може да биде основа за впечатлив изглед. Светкавите и металик формули ја одбиваат светлината и ги осветлуваат капаците, па се добар избор за вечерна шминка или кога сакате да му дадете посебен белег на едноставниот изглед.

Ако првпат го пробувате овој тренд, сенката со сатенски финиш е добар почеток. Таа не е ниту сосема мат ниту премногу светкава, па лесно се вклопува во различни стилови на шминкање. За поинтензивен резултат, комбинирајте ја со светкави пигменти или нанесете ја врз база што ќе ја нагласи бојата.

Што е важно при изборот на долготрајна бела сенка?

Обрнете внимание на пигментацијата, текстурата и завршниот ефект. Добрата формула треба да даде рамномерна боја без да мора да нанесувате многу слоеви. Соодветната база за капаци, пак, може да помогне шминката подолго да остане на своето место.

Кремастите и течните сенки често се лесни за нанесување и можат да дадат интензивна боја, додека сенките во прав се практични за разлевање и постепено засилување на нијансата. Независно од текстурата, важно е производот рамномерно да се распоредува и да не се собира во наборот на капакот. Ако сакате изразена бела боја, изберете добро пигментирана формула што не станува проѕирна по нанесувањето.

Како белата сенка да издржи во текот на денот?

Подготовката на капаците е еднакво важна како и изборот на сенката. Пред шминкањето, кожата треба да биде чиста и сува, без вишок крем или масни остатоци што можат да ја намалат трајноста. Потоа нанесете тенок слој база за сенка и почекајте да се исуши или да се фиксира.

Сенките во прав нанесувајте ги со рамна, поцврста четкичка и со лесно тапкање, наместо со размачкување по капакот. Така полесно ќе добиете рамномерна боја, без проѕирни делови. За поголем интензитет, додајте уште еден тенок слој наместо одеднаш да нанесете голема количина.

Белата сенка може да остане ненаметлив детаљ или да стане главниот акцент во шминката.

Извор: Lepota i Zdravlje