Џереми Лондон по апелот за работа и сместување: „Имам стан на Флорида, не сум бездомник“

Џереми Лондон го појасни неодамнешниот апел за помош, во кој напиша дека би можел да остане без работа и без дом.

Педесет и тригодишниот актер од „Седмо небо“ доцна во петокот на Икс објави дека поседува стан на Флорида и го обвини магазинот „Пипл“ дека го претставува како бездомник. Објасни дека првичната објава ја напишал во шок поради однесувањето на својот шеф и затоа што не сакал да си замине од Пенсилванија, каде што работел во фирма за одржување и сечење дрвја.

„Луѓе… имам стан на Флорида. А ‘Пипл’ ме претставува како бездомник. Само бев шокиран од однесувањето на мојот шеф и не сакав да морам да се вратам на Флорида. Боже, навистина немаат за што друго да известуваат?“

Лондон се огласи и под објава на „Е! њуз“ за случајот, извинувајќи се за нејасниот начин на кој се изразил.

„Ви гарантирам дека ова беше преувеличено. Имам стан на Флорида. Едноставно не сакав да ја напуштам Пенсилванија, бидејќи се вљубив во неа. Дефинитивно бев тажен и во шок. Но, не сум без средства за живот. Се извинувам што во тој момент се изразив нејасно“, напиша тој.

Еден корисник му посочи дека првичната објава „звучела очајно“ и оставала впечаток дека ќе остане бездомник. Актерот одговори: „Бев тажен. Лошо се изразив. Ја прифаќам одговорноста за тоа. Ја научив лекцијата“.

Лондон им се заблагодари и на сите што му се јавиле, порачувајќи: „ОДЛИЧНО сум!“ Тој оцени дека ситуацијата на крајот би можела да испадне добра за него, бидејќи ќе се оддалечи од шефот, кого го нарече „одвратен тип“, и ќе им се врати на синот и на својата уметност.

Додаде дека веќе има други можности за работа, дека наскоро ќе снима филм и дека остатокот ќе им го препушти на своите адвокати.

Појаснувањето следува по објавата што Лондон ја сподели во четвртокот, а потоа ја избриша. Како што пренесе „Пипл“, во неа актерот напишал дека неговиот шеф минува низ „некаква психичка криза“ и дека поради тоа би можел да ги загуби работата и домот.

„Луѓе… мојот шеф минува низ некаква психичка криза и можеби ќе останам без работа и без дом… Ова не може повторно да ми се случува“, напишал тој.

„Ако некој има работа и дом за мене, ве молам да ми јави. Сакам, покрај глумата, да работам и редовна работа. Добар човек сум. Зошто постојано ми се случува ова? Не сум добро.“

Лондон и претходно работел други работи паралелно со актерската кариера. Меѓу неговите познати улоги се оние во сериите „Седмо небо“ и „Party of Five“, како и во филмот „Mallrats“.

Извор: Just Jared