Ноември пред екраните: Нови сезони и серии за долгите есенски вечери

Со доаѓањето на ноември, сè попримамливо звучи вечерта да ја поминеме дома, завиткани во омиленото ќебе, со топол пијалак и добра серија. Излегувањата и долгите прошетки лесно им го отстапуваат местото на удобниот кауч, а изборот на следната приказна што ќе нè задржи пред екранот станува мал вечерен ритуал. Овој месец има доволно материјал за нова листа за гледање: од историски драми и напнати трилери до научна фантастика и серии инспирирани од вистински настани. Издвојуваме десет наслови што вреди да ги следите во ноември.

Што ни носат стриминг-платформите во ноември?

The Gilded Age

Раскошни ентериери, костими изработени како уметнички дела и многу сплетки — The Gilded Age ги има сите состојки за љубителите на историските драми. Четвртата сезона ја продолжува приказната за њујоршкото високо општество кон крајот на 19 век, кога старата аристократија се соочува со растечкото влијание на новопечените богаташи. Во средиштето повторно е Берта Расел, која ја игра Кери Кун, решена на своето семејство да му обезбеди место во круговите што тешко прифаќаат нови членови. Нејзината противничка Агнес ван Рајн, во толкување на Кристин Барански, цврсто се држи до традиционалните убедувања, додека Меријан Брук, која ја игра Луиза Џејкобсон, се обидува да го најде сопствениот пат. Четвртата сезона веќе е достапна на „ХБО Макс“.

The Empress

За оние што сакаат историски приказни во кои романтиката и дворскиот раскош се испреплетуваат со борбата за лична слобода, ноември го носи завршното поглавје на The Empress. Третата сезона пристигнува на „Нетфликс“ на 12 ноември и го продолжува раскажувањето за австриската царица Елизабета, позната како Сиси, чиј живот на дворот е далеку од бајка. По воените трауми, брачните тешкотии и политичките притисоци, таа се соочува и со здравствени проблеми. Средбата со унгарскиот револуционер, грофот Андраши, кого го толкува Дејан Буќин, отвора ново поглавје во нејзиниот живот.

The Hunting Wives

Луксузните домови, беспрекорно уредените простории и привидно совршеното секојдневие кријат тајни што можат да го урнат сето она што нивните сопственици го граделе со години. Светот на The Hunting Wives е многу помрачен отколку што изгледа. Втората сезона пристигнува на „Нетфликс“ на 26 ноември и повторно нè води во Тексас, каде пријателството меѓу Софи и Марго прераснува во однос исполнет со привлечност, манипулации и опасна борба за моќ. На почетокот на новата сезона тие веќе не се на иста страна, но старите тајни и новите непријатели повторно ги зближуваат. Серијата е избор за гледачите што сакаат психолошки трилери со гламур, љубовни заплети и неочекувани пресврти.

The Altruists

Гледачите што ги интересираат вистински финансиски скандали би можеле да ја додадат The Altruists на својата листа. Серијата од осум епизоди доаѓа на „Нетфликс“ на 19 ноември и ја обработува приказната за Сем Бенкман-Фрид и Керолајн Елисон — млади луѓе кои сакале да го променат глобалниот финансиски систем, а потоа се нашле во средиштето на еден од најголемите скандали во светот на криптовалутите.

Џулија Гарнер, позната по Ozark и Inventing Anna, ја толкува Керолајн Елисон, а Ентони Бојл го игра Бенкман-Фрид, основачот на криптоберзата ФТХ. Зад јавната слика за млади технолошки визионери постепено излегува на виделина многу посложена приказна за парите, моќта, довербата и одговорноста.

Black Doves

За вечерите кога ви се гледа нешто понапнато, на 5 ноември пристигнува втората сезона на Black Doves. Кира Најтли повторно ја игра Хелен, жена со двоен живот: за јавноста е сопруга на политичар, а во тајност работи за организација што собира државни тајни. Кога нејзиниот сопруг Валас, кого го толкува Ендру Бакан, ќе се доближи до функцијата британски премиер, влогот станува поголем, а прикривањето на нејзиниот таен живот сè потешко. Сара Ланкашир се враќа како мистериозната госпоѓа Рид, а на актерската екипа ѝ се придружуваат Амбика Мод и Нев Кембел. Новата сезона носи уште повеќе опасности, но го отвора и прашањето колку сме подготвени да ризикуваме за да ги заштитиме оние што ги сакаме.

The Lord of the Rings: The Rings of Power

Меѓу издвоените наслови е и третата сезона на The Lord of the Rings: The Rings of Power.

Извор: Lepota i Zdravlje