Семејството на Перез Хилтон со охрабрувачки вести, три месеци по самоповредувањето во пренос во живо

Семејството и тимот на Перез Хилтон споделија охрабрувачки вести за неговото закрепнување, три месеци откако блогерот се самоповреди за време на вознемирувачки пренос во живо.

„Поминаа три месеци откако нашето семејство почна да се справува со овој тежок период. Иако не беше лесно, благодарни сме што можеме да споделиме и позитивни вести“, се наведува во пораката објавена на неговата веб-страница во вторникот, на 3 ноември.

Семејството соопшти дека Хилтон имал можност да помине време со најблиските за време на одобрени посети, вклучително и една посебна вечер кога, заедно со своите три деца, го прославил 73. роденден на мајка си.

„Овие заеднички моменти им значеа многу на сите“, стои во соопштението.

Неговите најблиски објаснија дека низ целото искуство учат колку може да биде сложено закрепнувањето по сериозна криза со менталното здравје.

„Како и многу луѓе што никогаш не поминале низ нешто слично, не разбиравме целосно колку време, грижа и поддршка може да бидат потребни. Низ разговори со луѓе што имале слични искуства, сфативме дека надминувањето на првичната криза е само почеток. Не постои ист рок за закрепнување за сите и учиме колку е важно да одиме чекор по чекор“, порача семејството.

Неговиот тим и семејството сè уште не знаат кога точно ќе се врати дома, но се надеваат дека тој ден се приближува.

„Најважно ни е да ги има времето и поддршката што му се потребни за да продолжи да напредува. Во меѓувреме, децата се добро, одат на училиште, се занимаваат со своите активности и го продолжуваат секојдневието. Убаво си поминаа и за Ноќта на вештерките. По сè низ што поминаа, особено ни значи што ги гледаме насмеани, како се забавуваат и едноставно уживаат во детството“, се наведува во пораката.

На крајот, семејството им се заблагодари на сите што продолжуваат да се интересираат за Хилтон и да испраќаат пораки со поддршка: „Неизмерно сме благодарни за вашата љубов, сочувство и поддршка. Тоа му значи многу на нашето семејство“.

Извор: US Weekly