Колман Доминго за школските денови со Вил Смит: „Тој беше најпопуларен, а јас бев бубалица“

Колман Доминго се присети на средношколските денови, кога одел во истото училиште со својот денес славен колега Вил Смит.

Педесет и шестгодишниот актер, номиниран за Оскар, гостуваше во подкастот Friends Keep Secrets со Бени Бланко, Лил Дики и Кристин Баталуко во вторник, на 30 ноември, каде што призна дека во средно училиште не бил меѓу популарните ученици.

„Роден сум и израснав во Западна Филаделфија. Одев во средно со Вил… Заедно имавме часови по физичко и по природни науки“, раскажа тој.

Двајцата учеле во средното училиште „Овербрук“ во Филаделфија, а Смит бил една генерација пред Доминго.

Ѕвездата на „Еуфорија“ објасни дека никогаш не биле пријатели: „Тој беше популарното момче, а јас бев бубалица“.

Според Доминго, актерот од „Принцот од Бел Ер“ „навистина бил најпопуларното момче во средното училиште“. Уште тогаш настапувал како локален рапер со Џези Џеф, а сите популарни ученици оделе да ги гледаат.

Доминго откри и дека, откако двајцата станале славни, речиси воопшто не се среќавале. „Најчудно е што во текот на нашите кариери никогаш не сум налетал на него“, рече тој.

Единствената средба што ја спомена била во времето кога работел како келнер во ресторан во Филаделфија.

„Сигурен сум дека во некој момент ќе се видиме. Тоа ќе биде топла средба, со заедничките спомени од Филаделфија“, додаде Доминго.

Извор: Just Jared