Лулката на ренесансата, градот во кој твореле Микеланџело, Леонардо да Винчи и Ботичели, на секој чекор го открива своето уметничко богатство. Но, Фиренца ја има и онаа поопуштена страна на италијанската култура, посветена на уживањето. Величествените градби, тесните улички со автентични продавници, мирисот на свежо подготвени тестенини и долгите паузи за кафе нè повикуваат да забавиме, да застанеме пред она што ќе ни го привлече погледот и да им се радуваме на малите нешта. Токму затоа, продолжен викенд во Фиренца е одлична можност да ги споиме ренесансните ремек-дела со едноставните задоволства поради кои толку ја сакаме Италија.
Низ градските улици, плоштади и посебни катчиња овојпат нè води актерката Марија Богдановиќ. Нејзиниот патопис нè поттикнува да ја вброиме Фиренца меѓу следните дестинации и открива зошто многумина што еднаш ја посетиле, повторно ѝ се враќаат.
Четири дена во Фиренца — град што повикува повторно да го посетите
Италија секогаш е добар избор за продолжен викенд, но бидејќи имав толку многу градови на списокот за посета, долго не можев да решам од каде да почнам. Оваа есен ја избрав Фиренца. Често слушав дека луѓето постојано ѝ се враќаат, а сега и самата разбрав зошто. Фиренца е вистински музеј под отворено небо. Богатата историја, прекрасната архитектура, одличната храна и автентичните италијански продавници ја прават празник и за очите и за душата.
Четири дена се идеални за посета на Фиренца, а најдов и директен лет во петок наутро, со враќање во понеделник навечер. Така можев целосно да го искористам секој ден, а патувањето ми дојде како краток одмор што навистина ме освежи. Уште при слетувањето, Тоскана ве пречекува со прекрасен поглед кон чемпресите. Од аеродромот до центарот на Фиренца се стигнува со трамвај за само дваесетина минути.
Од Дуомо до Понте Векио: прошетка низ историјата
Ако некаде обичната прошетка може да стане туристичка атракција, тоа е во Фиренца. Зад секој агол ве чекаат градби и уметнички дела пред кои ќе посакате да застанете, но има и места што никако не треба да ги пропуштите. Симбол на градот е прочуената катедрала Санта Марија дел Фиоре, позната и како Дуомо. Нејзината купола ја вбројува меѓу најголемите архитектонски достигнувања на ренесансата. На плоштадот Пјаца дела Сињорија се наоѓа реплика на Микеланџеловиот Давид, а во близина е и Лоџа деи Ланци — своевидна галерија на отворено што ме воодушеви. Меѓу знаменитостите се и палатата Векио и Стариот мост, Понте Векио, исполнет со златарници. Погледот кон него е уште поубав од соседниот мост.
Ако имате време само за една галерија, изберете ја Уфици. Таму ќе ви стане сосема јасно зошто Фиренца ја нарекуваат лулка на ренесансата. Можеби звучи како клише, но најсилен впечаток ми остави Ботичелиевото Раѓањето на Венера. Микеланџеловото ремек-дело Давид, пак, се наоѓа во Галеријата на Академијата. Секогаш советувам билетите да се набават однапред преку интернет, за да се избегне непотребното чекање.
Каде да уживате во њоки, пица и фокача
Општо е познато дека во Италија тешко можете да останете гладни. По враќањето во Белград, постојано мислев на ресторанот Траторија За За и на нивните њоки и равиоли со тартуфи. Ако повеќе ви се јаде добра пица, одличен избор е Густапица. Најдоброто афогато е во џелатеријата Виволи, но подгответе се за чекање во ред — многумина веќе знаат за него.
Извор: Lepota i Zdravlje
Учество во игри на среќа е дозволено за лица со 18+ години. Играј одговорно!