Поранешната портпаролка на Белата куќа, Кејти Захарија, би сакала повторно да работи за претседателот Доналд Трамп, иако на почетокот на месецов беше разрешена по само пет дена на функцијата.
„Со задоволство повторно би работела за него“, изјави 41-годишната Захарија во емисијата „Пирс Морган без цензура“ во средата, на 28 октомври.
Под лупа се најде и нејзината професионална биографија, откако се појавија прашања за нејзините квалификации за адвокатура. Захарија повеќепати се претставувала како адвокатка, но медиуми, меѓу кои Њујорк тајмс и Си-ен-ен, објавија дека не успеале да најдат нејзина адвокатска лиценца ниту во Калифорнија ниту на друго место во САД.
По бурната недела во Вашингтон, Захарија му кажа на водителот Пирс Морган дека е горда на вложениот труд, и покрај критиките со кои се соочила.
„На крајот од неделата можев да седнам со моите деца, кои целата таа недела беа во Вашингтон. … Можев да им кажам: ‘Дадов сѐ од себе со тоа што го имав на располагање и му служев на претседателот најдобро што знаев’“, раскажа таа.
„Никогаш нема да се откажам од лојалноста кон него и не дозволив да ми го променат карактерот, да ме променат како личност“, продолжи Захарија. „Моите деца го разбираат тоа. Имам четири, на возраст од 12, 10, 8 и 6 години. Особено најстарото ми рече: ‘Мамо, многу се гордеам со тебе. Ниту една друга мајка во земјава немаше да ја добие таа работа без напорната работа што ти ја вложи’.“
„Многу луѓе не знаат што беше потребно за да се добие таа работа, а многумина носат заклучоци врз основа на претпоставки. Но моите деца ги видоа напорната работа, крвта, потта и солзите“, додаде таа.
Според Захарија, притисокот и преиспитувањата со кои се соочувала во петте дена како портпаролка особено тешко ѝ паднале на нејзината мајка, која е демократка.
„Мајка ми, која е демократка со изразено левичарски ставови, не можеше да ги гледа водечките медиуми“, тврди Захарија. „Она што можам да го кажам е дека тоа, всушност, ја зацврсти поддршката од моето семејство. Имаме многу различни политички ставови и тие не секогаш ме поддржувале во мојата поддршка за претседателот Трамп.“
Извор: US Weekly
Учество во игри на среќа е дозволено за лица со 18+ години. Играј одговорно!