Бриџертон се враќа: датум на премиера на четвртата сезона и сѐ што треба да знаете

Обожавателите на „Бриџертон“, подгответе се за вистинско уживање!

Нетфликс конечно откри кога ќе пристигне четвртата сезона – и тоа во два делови: првиот дел започнува на 29 јануари, а вториот следува на 26 февруари 2026 година. И како тоа да не е доволно, потврдено е дека ќе следуваат и петта и шеста сезона!

По две сезони кои верно го следеа редоследот на романите од Џулија Квин, третата ни донесе изненадувања и ја адаптираше четвртата книга – „Господин Бриџертон“. Главната дилема меѓу фановите за тоа кој ќе биде во центарот на четвртата сезона – Бенедикт или Елоиз – конечно е решена: фокусот повторно оди кај Бенедикт Бриџертон, кого го толкува британскиот актер Лук Томпсон. Тој ја опиша сезоната како бајковита и романтична, со доза на мистична магија што совршено се вклопува во универзумот на „Бриџертон“.

Новата сезона започнува со гламурозен маскенбал, а срцето на Бенедикт го освојува таинствената Софи, во изведба на актерката од корејско потекло Јерин Ха. За неа ова не е првпат да блесне на телевизиските екрани – покрај серијата „Хало“, наскоро ќе ја гледаме и во „Дјун: Пророштво“.

Освен главните ликови, ќе се појават и многу нови: сестрите Розамунд Ли (Мишел Мау) и Пози Ли (Изабела Веј) пристигнуваат во друштвото на Мејфер, во посета на Елоиз и Хајесинт во домот на Бриџертонови. Додека Розамунд е сериозна и амбициозна како нејзината мајка Араминта Ган (Кејти Леанг), Пози е сониовна и весела, носејќи разиграност во строгото општество.

Покрај новите ликови, верните фанови ќе бидат воодушевени од враќањето на омилените актери: Џонатан Бејли, Никол Кофлан, Хана Дод, Лук Њутн и Рут Џемел повторно ќе ги гледаме како дел од семејството Бриџертон.

Сезоната ќе брои осум епизоди, а овојпат продукцијата планира подлабоко да ги истражи класните разлики и динамиката на регентското општество – значи очекувајте уште повеќе интриги, тактики и романтични заплети. Продуцентите ветуваат најверна адаптација на романот досега, но секако, со неколку изненадувања што ќе ве држат „залепени“ за екранот.

Ако мислевте дека авантурите на Бриџертонови се при крај, размислете повторно – љубовта, драмата и гламурот допрва следуваат!