Трагедија: Почина поранешниот капитен на Црвена звезда

Трагедија за фудбалскиот свет: Почина поранешниот капитен на Црвена ѕвезда

Фудбалот денес тагува – поранешниот капитен на Црвена ѕвезда, Дејан Миловановиќ, почина ненадејно во Белград на 42-годишна возраст. Веста ја потресе не само ѕвездашката јавност, туку и сите љубители на фудбалот низ регионот.

Миловановиќ се онесвестил за време на натпревар меѓу ветераните на Звездара и ПКБ, кој се одиграл во вторник навечер. Во 7. минута постигнал гол, но само неколку минути подоцна, додека изведувал корнер, изгубил свест и паднал на тревникот. Екипата на брза помош веднаш интервенирала, лекарите го реанимирале на лице место и го транспортирале во КБЦ Звездара, но неговото срце не издржало два последователни инфаркта.

Оваа тажна вест силно одекна и во Лигата на ветераните, која во официјално соопштение најави дека колото закажано за 18 септември се одложува во знак на жалост.

„Почитувани претставници на клубовите, пред неколку минути, за време на натпревар меѓу ветерани, почина Дејан Миловановиќ, играчот на ФК ‘Звездара’. Поради ова, вонредното коло кое требаше да се одигра на 18.09 се одложува“, стои во краткото соопштение.

Дејан Миловановиќ беше син на легендарниот Ѓорѓе Миловановиќ и уште од детството тргна по стапките на својот татко. Ги помина сите младински категории на Црвена ѕвезда, речиси секогаш со капитенската лента, а во 2001 година влезе во првиот тим. Во текот на својата кариера со црвено-белиот дрес забележа 230 настапи и постигна 48 голови. Навивачите го паметат по силните удари од слободни удари, но и по голот против Партизан во славното 132. „вечно дерби“ кое заврши со 4:1.

Заедно со Бошко Јанковиќ, Душан Баста и Марко Перовиќ, беше дел од легендарната генерација родена 1984 година, која донесе три шампионски титули и четири трофеи од Купот. Подоцна настапуваше и за францускиот Ленс, а во 2010 година накратко се врати на Маракана.

Неговото прерано заминување остави длабока празнина кај поранешните соиграчи, пријатели и верните навивачи на Црвена ѕвезда. Дејан Миловановиќ ќе остане запаметен како борец на теренот и симбол на една славна ѕвездашка епоха.