Домашни чоколадни колачиња со банана и овес: Крцкави однадвор, меки однатре

Желбата за нешто слатко не мора секогаш да заврши со купени слатки или со десерт за кој се потребни многу време и труд. Овие здрави чоколадни колачиња се едноставен избор, а за нивната подготовка се користат состојки што често веќе ги имаме дома. Крцкави однадвор, меки однатре и со парченца чоколадо, одлични се со утринското кафе, како ужина во текот на денот или како мал сладок залак по оброкот.

Здрави чоколадни колачиња

Рецептот се подготвува брзо, а состојките лесно може да се приспособат според вкусот. Наместо рафиниран шеќер, за сладост се додаваат банана и малку мед. Овесните снегулки обезбедуваат растителни влакна и пријатна текстура, а темното чоколадо го надополнува вкусот со богата чоколадна нота поради која ќе посакате повторно да ги направите.

Состојки:

2 зрели банани

150 г овесни снегулки

2 лажици путер од бадеми

1 лажица мед

1 лажица какао во прав

50 г темно чоколадо

1/2 лажичка прашок за печиво

• прстофат цимет
• прстофат сол

Подготовка:

Загрејте ја рерната на 180 степени и обложете плех со хартија за печење. Испасирајте ги бананите со виљушка додека не добиете изедначена смеса, па додајте ги путерот од бадеми и медот. Промешајте, а потоа додајте ги овесните снегулки, какаото, прашокот за печиво, циметот и солта.

Исечкајте го темното чоколадо на мали парчиња и додајте го во смесата. Добро измешајте ги сите состојки. Со лажица оформете мали колачиња и наредете ги на плехот, оставајќи малку простор меѓу нив. Лесно притиснете ги за да добијат форма на бисквит.

Печете ги околу 12–15 минути, односно додека рабовите не станат малку поцврсти. Оставете ги да се изладат неколку минути пред да ги префрлите од плехот. Имајте предвид дека овие колачиња се помеки од класичните бисквити, особено додека се топли.

Како да ги направите уште повкусни?

Рецептот лесно се приспособува на вашиот вкус. Ако сакате покрцкава текстура, заменете дел од овесните снегулки со сечкани ореви или лешници. За поизразен чоколаден вкус додајте уште малку какао, а прстофат ванила убаво ќе ја заокружи аромата. Може да употребите и чоколадо со повисок процент какао, зависно од тоа колку интензивен вкус сакате.

Чувајте ги колачињата во затворен сад неколку дена. Највкусни се кога целосно ќе се изладат, послужени со кафе, чај или чаша млеко. За нивната подготовка не се потребни посебни готвачки вештини, а се практичен начин дома секогаш да имате нешто слатко.

Фото: zahara, Kaique Lopes, erick / Pexels

Извор: Lepota i Zdravlje