Некогаш омилената холивудска дива и вечна инспирација на девојките на Пинтерест ширум светот, Блејк Лајвли, деновиве не се најде на насловните страници поради нејзиниот беспрекорен стил – туку поради сериозни обвинувања кои може да ја урнат внимателно изградена слика на совршена ѕвезда.
Додека трае правната битка помеѓу неа и актерот Џастин Балдыни (нејзин партнер од филмот „It Ends With Us“), шокантни приказни од минатото испливуваат на површина – поточно од времето кога Блејк Лајвли се обиде да влезе во светот на лајфстајл бизнисот преку својот краткотраен бренд Preserve.
Неколку поранешни вработени од таа модна авантура, која брзо се претвори во кошмар, проговорија – и да, ситуацијата звучи како сценарио од некоја најлудо замислена епизода на Нетфликс серија. Се зборува за целосен хаос во фирмата, токсична работна атмосфера, непрофесионализам и, како шлаг на тортата – неплатени прекувремени часови.
Вработените, верувале или не, со месеци работеле без основен мебел – седеле на под, бидејќи маси и столици никогаш не стигнале. А додека луксузните производи со печат на Блејк Лајвли се продавале по вртоглави цени, тимот кој ги промовирал немал ни каде да седне.
Посебно внимание привлекува нејзиниот брат, Ерик Лајвли, кој бил поставен за креативен директор на брендот. Наместо креативност – се вели дека донел само неорганизираност, доцнења и „утрински дремки“, поради кои вработените често чекале надвор на студ додека тој не се разбуди и ја отклучи канцеларијата.
Во меѓувреме, пристигнувале и пораки за неплатени плати, неможност да се покријат ни патните трошоци до работа, и општ впечаток дека целиот проект се распаѓа додека јавноста верува дека Блејк Лајвли води модерен рај од бренд.
А можеби најзагрижувачки е тврдењето дека сѐ било „турнато под тепих“. Според една поранешна вработена, агентката Лесли Слоун направила сѐ за да се избрише секоја трага од фијаското наречено Preserve.
Денес, речиси една деценија подоцна, таа сенковита страна од минатото се враќа како бумеранг – и тоа токму во моментот кога Блејк се обидува да го заземе морално највисокото тло во нова судска драма.
И додека милиони обожаватели сѐ уште се воодушевуваат од нејзините модни избори и гламурозни појавувања, прашањето останува: дали зад совршената фризура и haute couture фустаните стои лице што досега не сме имале прилика да го запознаеме?
