Рауфи тврди: Ова е уште еден доказ дека „Монструм“ е монтиран процес од МВР

Уште една потврда дека случајот „Монструм“ е монтиран процес, посочи по денешното рочиште, адвокатот на обвинетите, Насер Рауфи.

Имено, Рауфи посочи дека МВР го монтирал овој процес не само со заштитениот сведок и автомобилот, туку и со извршеното вештачење за земјата и оружјето кое било користено кај Смилковското езеро.

Сомнително според Рауфи е тоа што доставените примероци за вештачење не се знае кој ги однел во МВР, по што се јавува сомнеж дека една од чаурите е пронајдена во Билимбегово, а експертите тврдат дека одговара на оние од Смилковското езеро, и е подметната меѓу останатите.

„На сликата со број 13, каде има три чаури, на едно место не е возможно две да не одговараат со оние од Смилковското езеро, а една да одговара. Тука се јавува сомнеж дека таа чаура е извадена од депото на МВР и вметната помеѓу останатите“, вели Рауфи.

Инаку, следното рочиште е закажно за 26. октомври, кога ќе се продолжи со доказната постапка и наодите дадени од останатите вештаци.