Ненадејно почина Ерик Бауза, актерот кој им го позајмуваше гласот на Душко Долгоушко и Дафи Дак

Ерик Бауза, актерот познат по гласовите што им ги позајмуваше на бројни анимирани ликови, ненадејно почина на 46-годишна возраст.

Веста ја соопшти неговото семејство во неделата вечер, на 25 октомври, преку објава на неговиот профил на Инстаграм.

„Соопштение од семејството на Ерик Бауза:

Ерик Бауза, добитник на наградата ‘Еми’ и актер кој во поновите продукции им го позајмуваше гласот на легендарните ликови од ‘Луни тјунс’, Душко Долгоушко и Дафи Дак, како и на десетици други омилени цртани ликови, ненадејно почина. Дополнителни информации ќе бидат објавени подоцна.“

Во моментот кога беше објавена веста за неговата смрт, на профилот на Бауза сè уште имало активна приказна на Инстаграм. Во неа било споделено кратко видео што го објавил на својот профил во саботата, на 24 октомври.

„Ова е најблиску што некогаш ќе стигнам до настап на Бродвеј, хахаха. Душко Долгоушко и Твити може да се слушнат во најавите на МТА во Њујорк — по повод 30-годишнината од ‘Space Jam’“, напишал тој покрај видеото. Во него се прикажани ликови од Looney Tunes во њујоршкото метро, а се слуша и гласот на Бауза како Душко Долгоушко, кој ги чита најавите на градскиот превоз.

Претходно годинава, Бауза ги озвучи Душко Долгоушко, Дафи Дак, Птицата Тркачица, Порки Пиг и уште многу други ликови во Coyote vs Acme.

Неговата кариера траеше 23 години и опфаќаше стотици ангажмани. Им позајмуваше гласови на ликови во сериите Kiff, The Loud House, Spidey and His Amazing Friends, Rick and Morty, Teen Titans Go!, Young Jedi Adventures, а меѓу најновите проекти му беше и Avatar: Seven Havens.

Работеше и на филмовите The Super Mario Galaxy Movie, Minions & Monsters, Rise of the Teenage Mutant Ninja Turtles: The Movie, Space Jam: A New Legacy, Smurfs: The Lost Village и неодамна објавениот Forgotten Island.

Во 2022 година ја освои својата прва награда „Еми“ на доделувањето награди за детска и семејна програма, за извонредна гласовна изведба во анимирана програма, за Looney Tunes Cartoons. Во 2023 година беше награден за извонредна гласовна изведба во програма за деца од предучилишна возраст за Bugs Bunny Builders. Доби и признание за извонредна гласовна изведба во програма за деца или помлади тинејџери за Teen Titans Go!: Warner Bros. 100th Anniversary.

Извор: Just Jared