Украина тврди дека руските војници во подвижни крематориуми ги спалувале телата на загинатите цивили за да ги прикријат доказите

Градоначалникот на Мариупол, Вадим Бојченко, истакна дека најмалку 5.000 цивили загинаа во руските бомбардирања во југоисточниот украински град. Ова тој го изјави за време на тркалезната маса што се емитуваше вчера во живо на Фејсбук.

– Се проценува дека меѓу загинатите има најмалку 210 деца, истакна градоначалникот на Мариупол.

Toj ја обвини Русија дека користи мобилни крематориуми во градот за да ги прикрие доказите за убиствата на цивили.

-Тоа е причината што Русите не брзаат да дадат зелено светло на турската мисија и другите иницијативи за целосна евакуација на Мариупол, напишал Бојченко.

Градоначалникот напишал и дека „луѓе поврзани со Русија ги собираат и кремираат телата на жителите на Мариупол“.

Бојченко го опиша уништувањето од војната во Мариупол, раскажувајќи ужасни детали за нападите, односно дека намерно била нападната детска болница во градот, дека театарот е намерно уништен и покрај поставените натписи „Деца“ на паркинзите на театарот. Во зградата биле засолнати повеќе од 900 луѓе.

– Тоа се само неколку примери за намерно уништување на цивилното население на Мариупол, додаде градоначалникот.