Тифани Тисен на 52 години мора да го замени колкот: Болките ѝ ги ограничуваат секојдневните активности

Тифани Тисен, позната по улогата во „Saved by the Bell“, проговори за здравствените проблеми и силните болки со кои се соочува. Во подкастот на Том Папа, во епизодата објавена во вторник, на 10 ноември, 52-годишната актерка откри дека мора да го замени колкот.

„Морам да направам замена на колкот, навистина морам“, рече Тисен.

Болките ѝ оневозможуваат одредени активности, меѓу кои и рекреативното играње пиклбол со семејството.

„Играме сите семејно“, рече актерката, која со сопругот Брејди Смит има две деца. „Лекарот не ми рече дека причината е пиклболот, но веројатно не ми помага. Последниве неколку недели не можам да играм бидејќи колкот многу ме боли.“

Тисен во последно време престојува наизменично во Калифорнија и во Ванкувер, Канада, каде што ја снима новата серија „Coven Academy“ на Дизни+.

„Градот е прекрасен. Во иста временска зона сум, што му олеснува на моето семејство, а и лесно се стигнува со авион, па се трудам да се враќам дома. Никогаш не дозволувам да поминат повеќе од две недели без да го видам семејството“, раскажа таа за работата во канадскиот град. „Секако дека треба приспособување. Не ми е по волја да бидам отсутна, две недели се многу, но мама мора да работи.“

Серијата „Coven Academy“, во која Тисен ја игра директорката Ема Грејвс, неодамна доби зелено светло за втора сезона.

„Првата сезона заврши со голема неизвесност околу мојот лик. Се открива важна поврзаност меѓу мене и главната девојка, па тоа веројатно ќе биде нешто со кое ќе мора да се занимаваат во втората сезона“, најави актерката. На крајот се открива дека Ема е биолошката мајка на Брајар Робертс, која ја игра Малина Паули Вајсман.

„Нерасчистените работи од првата сезона се пренесуваат во втората. Всушност, приказните на многу ликови останаа во неизвесност, но најголемото откритие на крајот беше поврзано со мојот лик“, додаде таа.

Со улогата во „Coven Academy“, Тисен успеала да ги воодушеви и своите деца — 16-годишната Харпер и 11-годишниот Холт.

Извор: US Weekly