„Секогаш беше насмеан“: Блиските се сеќаваат на Чарлс Харисон, чија сопруга е обвинета за убиството на него и нивниот син

Чарлс Харисон, чија сопруга е обвинета за убиството на него и нивниот тригодишен син, во сеќавањата на својата поранешна професорка останал како воспитан човек кој секогаш бил насмеан.

Пензионираната професорка по англиски јазик Кели Кригер му предавала на Чарлс, кој имал 36 години, додека учел во средното училиште „Јунион-Ендикот“.

„Се сеќавам како му помагав со есејот. Успеа да го заврши. Со пријателите секогаш беше насмеан и беше навистина мил“, раскажа Кригер.

Убави спомени за него сподели и поранешна соученичка, која побарала да остане анонимна. Таа го опиша како „прекрасен татко“ и рече дека често му го доверувала своето дете на чување.

„Чаз никогаш не се двоумеше да понуди помош. Секогаш беше тука за нас, без оглед на сè и без дополнителни прашања“, рече таа.

Металика Роуз Харисон, 27, е обвинета дека на 12 октомври ги убила сопругот Чарлс и нивниот син Тристан за време на семеен престој во одморалиштето „Грејт Волф Лоџ“ во Пенсилванија. Потоа се јавила на 911, ги пријавила убиствата и кажала дека сака да си го одземе животот.

Полицајците што пристигнале во одморалиштето ги пронашле Чарлс и тригодишниот Тристан со смртоносни убодни рани, кои, според обвинението, им ги нанела Металика. Таа била пронајдена со рани на рачниот зглоб и на вратот.

Металика била приведена и обвинета по две точки за убиство. Според судските списи во кои увид имал Us Weekly, до објавувањето на написот таа сè уште не се изјаснила за обвиненијата и немала ангажирано адвокат.

По убиствата се појавија тврдења дека Металика ги исцрпила средствата од пензиската сметка на Чарлс, од типот 401(k), за да плати тринеделен семеен престој во „Грејт Волф Лоџ“, реновирање на кујната и други трошоци.

Нејзината маќеа, Ејприл Тетга, изјави за New York Post дека обвинетата искористила пари од пензиската сметка на сопругот за патувањето, иако семејството се соочувало со сериозни финансиски тешкотии во месеците пред убиствата.

„Дефинитивно беше чудно, но веќе ги беа повлекле парите од пензиската сметка… Ништо не можевме да направиме во врска со тоа“, рече Тетга за таа финансиска одлука.

Us Weekly објави и дека „Капитал Уан“ на 14 мај поднел граѓанска тужба против Металика, тврдејќи дека таа ѝ должи на компанијата 11.824,36 долари. На 27 мај таа поднела известување дека има намера да се брани во постапката, но на 17 август окружниот судија Тод Кар ѝ наложил да го исплати целиот износ од 11.824,36 долари.

Извор: US Weekly