Еванџелин Лили за повлекувањето од Холивуд: „Отсекогаш мразев да бидам славна“

Еванџелин Лили проговори за причините поради кои решила да го напушти Холивуд.

Актерката, која има 47 години и е најпозната по серијата „Изгубени“ и улогата на Хоуп ван Дајн, односно Оса, во филмовите на Марвел, во 2024 година објави дека прави пауза од актерството на неодредено време за да му се посвети на семејството.

Нејзиното последно филмско појавување беше во „Антмен и Оса: Квантуманија“ од 2023 година, во кој повторно ја играше Хоуп ван Дајн.

Во ново интервју за CBN News, Лили објасни дека зад одлуката стоеле непријатноста што ѝ ја предизвикувала славата, здравствените проблеми и желбата за поисполнет живот воден од нејзината христијанска вера.

„Отсекогаш мразев да бидам славна“, рече таа. „Никогаш не сум го криела тоа. Отсекогаш велев дека славата е цената што ја плаќаш за богатството што можеш да го стекнеш како актер.“

Актерката номинирана за Златен глобус призна дека имало и моменти на страв откако се откажала од големите актерски хонорари и од влијанието што ѝ го донел успехот во Холивуд.

„Дефинитивно имаше моменти на страв, кога се прашував: ‘Како свесно и намерно да се откажеш од толку многу привидна моќ и влијание, од потенцијална заработка, но и од потврдата на сопствената вредност?’“, раскажа Лили.

Сепак, објасни дека верата ѝ помогнала да ја прифати иднината надвор од Холивуд. Таа верува дека Бог има повисока цел за нејзиниот живот, која не е ограничена само на актерството.

„Неверојатно ослободувачко и убаво е целосно да се препуштиш на довербата дека Бог има план за твојот живот“, рече Лили. „Тој план не мора да биде поврзан со слава, пари, богатство и моќ. Може да се однесува на поважни нешта, а сето тоа да се вклопи во една целина.“

Таа додаде дека здравјето значително ѝ се подобрило откако престанала да глуми, по долгогодишната борба со хронични здравствени проблеми поврзани со барањата на кариерата.

„Здравјето драматично ми се подобри“, изјави таа. „Кога се повлеков, веќе имав сериозни хронични здравствени проблеми.“

Претходно годинава, Лили сподели и нови информации за својата здравствена состојба по повредата на мозокот што ја претрпела при потрес на мозокот.

Извор: Just Jared