Празнична трпеза со стил: идеи што ќе ги користите цела сезона

Никогаш не е прерано да почнете да размислувате како ќе ја украсите празничната трпеза. Свечено поставената маса може и наједноставното дружење да го претвори во посебен момент. Но тоа не значи дека мора да се држите до црвените салфетки, златните украси и богатите аранжмани. Сѐ поголемо значење добиваат ситните детали, текстурите и неочекуваните споеви што создаваат пријатна атмосфера, а воедно го изразуваат личниот стил на домаќинот. Еве што е во фокусот годинава.

Како да ја уредите свечената трпеза

Од елегантни стаклени садови и детали со метален сјај до топли чоколадни тонови, кои последниве сезони се меѓу омилените во ентериерите, изборот за уредување на свечената маса е поголем од кога било. За впечатлив изглед не мора да го замените целиот сервис за јадење. Доволни се неколку добро избрани парчиња, интересна комбинација на бои и осветлување што ќе ја заокружи атмосферата. Издвојуваме четири идеи што можат да ве инспирираат за претстојните семејни собирања, празници и свечени вечери.

Класичната комбинација не излегува од мода

Црвената и златната се можеби најпрепознатливите празнични бои, но тоа не значи дека резултатот мора да биде предвидлив. Наместо да доминираат на целата маса, употребете ги во неколку внимателно распоредени детали. Бела или кремова основа, чинии со едноставни линии и златен прибор за јадење се одличен почеток. Црвените платнени салфетки, панделките околу чашите или неколку украси ќе го внесат препознатливиот празничен дух. Особено убаво изгледаат златни свеќници со различна висина, со тенки свеќи во бордо или темноцрвена боја. За уште малку елеганција, додајте гранчиња ела, еукалиптус или ненаметлив цветен аранжман. Најважна е рамнотежата: неколку впечатливи детали се доволни за трпезата да изгледа свечено, без да биде пренатрупана.

Празнична трпеза во чоколадни тонови

Кафеавата боја веќе извесно време има значајно место во уредувањето на домот, а сѐ почесто се појавува и на трпезата. Нијансите на чоколадо, какао, карамела и еспресо се интересна замена за вообичаените празнични бои, особено ако сакате топол, малку неочекуван и софистициран изглед. Како основа може да послужат темнокафеави керамички чинии, во комбинација со чаши од зачадено или кафеаво стакло. Златниот прибор за јадење особено се истакнува покрај овие тонови, а салфетките во боја на слонова коска или светлобеж ќе го дадат потребниот контраст. Убав детаљ се и свеќите во чоколадни нијанси, поставени во керамички или метални свеќници.

Ако сакате поразигран изглед, спојте повеќе кафеави нијанси и различни материјали. Мат керамиката, сјајното стакло, ленот и металот внесуваат слоевитост, па масата изгледа внимателно уредена, но не премногу формална. Неколку зелени гранчиња или сезонски цветови се сосема доволни за да ја раздвижат еднобојната поставка.

Извор: Lepota i Zdravlje